Ayurvedadipika (Carakatatparyatika) 1.1.1.2.2

1.1.1.2.2

abhidheyavattvaprayojanavattvanirvāhārthaṃ cābhidheyaśāstrayorabhidhānābhidheyalakṣaṇaḥ sambandhaḥ, prayojanaśāstrayośca sādhyasādhanabhāvalakṣaṇo+abhidhātavyaḥ| tatrehābhidheyaṃ hitāhitādirūpeṇāyuḥ| vakṣyati hi- “hitāhitaṃ sukhaṃ duḥkhamāyustasya hitāhitam| mānaṃ ca tacca yatroktamāyurvedaḥ sa ucyate” (sū. a.30) iti| atra ca sarvābhidheyāvarodho yathāsthānameva vyākaraṇīyaḥ| prayojanaṃ ca dhātusāmyam| yathoktaṃ- “dhātusāmyakriyā coktā tantrasyāsya prayojanam” (sū. a.1) iti| sambandho+apyāyuḥśāstrayorabhidhānābhidheyalakṣaṇaḥ, prayojanena ca dhātusāmyena samamasya śāstrasya heyopādeyajñānāvāntaravyāpārasya sādhyasādhanabhāvalakṣaṇaḥ| tadetatsarvaṃ dīrghañjīvitīyamityanena padena dīrghañjīvitaśabdamadhikṛtya kṛtaprayojanābhidhāyaka ‘dhātusāmyakriyā coktā’ ityādivākyābhidhāyakena darśitaṃ mantavyam| nanu, prayojanābhidhānaṃ śāstrapravṛttyarthamiti yaduktaṃ tanna yuktaṃ, yato na prayojanābhidhānamātreṇa prayojanavattāvadhāraṇaṃ, vipralambhakasaṃsāramocanapratipādakādiśāstreṣu prayojanābhidhāne+api niṣprayojanatvadarśanāt| atha manyase, āptaprayojanābhidhānametadato+atra yathārthatvaṃ; nanu bho kathamayaṃ prayojanābhidhāyī āptaḥ?