Ayurvedadipika (Carakatatparyatika) 6.7.4.1

6.7.4.1

doṣadūṣyasaṅgrahamāha- vātādaya ityādinā| vātādīnāṃ tritve siddhe+api traya iti vacanaṃ sarvakuṣṭheṣu trayāṇāmapi duṣṭidarśanārtham| dravyasaṅgraha iti dravyamārambhakaṃ kāraṇamucyate| arthalabdhamapi saptakamitipadaṃ sarvatra saptakaniyamārthaṃ punarucyate| yadyapi visarpāṇāmutpāde etānyeva sapta kāraṇāni, yaduktaṃ- “raktaṃ lasīkā tvaṅmāṃsaṃ dūṣyaṃ doṣāstrayo malāḥ| visarpāṇāṃ samutpattau vijñeyāḥ sapta dhātavaḥ” (ci.a.21) iti; tathā+api kuṣṭhaṃ cirakriyaiḥ sthirairdoṣairjanyate, visarpastu visaraṇaśīlairiti viśeṣaḥ| anye tu visarpā vātādibhirekaikaśo+api bhavantītyāhuḥ; yaduktaṃ- “pṛthak trayastribhiścaiko visarpā dvandvajāstrayaḥ” (ci.a.21) iti; tanna, tridoṣajatve+api visarpāṇāmekadoṣajakuṣṭhavadekadoṣajatvādivyapadeśastatrocyate| sapta caikādaśaiva ceti vicchedapāṭhena saptānāṃ kuṣṭhānāṃ mahākuṣṭhatvam, ekādaśānāṃ ca kṣudrakuṣṭhatvamiti bodhayati| nidāne+anabhihitānāmapi kṣudrakuṣṭhānāmiha cikitsārthaṃ vidhānam||9-10||