Virasimha 8.p2

8.p2

pibetsaṃdīpanaṃ hṛdyaṃ vātavarco'nulomanam | triphalā trivṛtā daṃtī daśamūlaṃ palonmitam || jale caturguṇe paktvā caturbhāgasthite rase | sarpireraṃḍajaṃ tailaṃ kṣīraṃ caikatra sādhayet || saṃsiddho miśrikasnehaḥ sakṣaudraḥkaphagulmanut | kaphavātavikāreṣu kuṣṭhaplīhodareṣu ca || prayojyo miśrikasneho yoniśūleṣu cādhikam| iti miśrikasnehaḥ | vyāmiśradoṣe vyāmiśra eṣa eva kriyākramaḥ | sannipātotthite doṣe tridoṣaghno vidhirhitaḥ || pūtīkapatragajacirbhaṭacavyavahrivyoṣaṃ ca saṃstarayutaṃ lavaṇopadhānam | dagdhvā vicūrṇya dadhimastuyutaṃ prayojyaṃ gulmodaraśvayathupāṃḍugadodbhaveṣu | vacā harītakī hiṃgu saiṃdhavaṃ cāmlavetasam | paṃcakṣāraṃ yavānī ca pibeduṣṇena vāriṇā || etaddhi gulmanicayaṃ saśūlaṃ saparigraham | bhinnaṃ trisaptarātreṇa vahnerdīptikaraṃ param || nādeyīkuṭajārkaśigrubṛhatītvagbilvabhallātakavyāghrīkiṃśukapāribhadrakajaṭāpāmārganīpāyikān | vāsāmuṣkakapāṭalā salavaṇā dagdhvā jalepācitam hiṃgvādiprativāpametaducitaṃ gulmodarāṣṭhīliṣu || iti nādeyīkṣāraḥ | vallūraṃ mūlakaṃ matsyān śuṣkaśākāni vaidalam | na khādeddhālukaṃ gulmī madhurāṇi phalāni ca || viḍaṃgājātikācavyātriphalāvyoṣacitrakaiḥ | dvau kṣārau paṃcalavaṇaṃ graṃthikaṃ puṣkaraṃ saṭhī || yavānyaḥkuṃcikā kuṣṭhaṃ viśālā dhānyakaṃ vacā | śatapuṣpāśvagaṃdhā ca hemakṣīrī sanīlikā || hapuṣā trivṛtā daṃtī satālā dviguṇottarā | cūrṇaṃ nārācakaṃ pītaṃ madyamāṃsāmlakāṃjikaiḥ || gulmārśograhaṇīrogaśvāsakāsodaraṃ jayet