Virasimhavaloka 16.p1

16.p1

saptāhātparataḥ kāryā śarīravraṇavatkriyā || vraṇe śvayathurāyāsātsa ca rāgaśca jāgarāt | tauca rukca divāsvāpātte ca mṛtyuśca maithunāt || iti sadyovraṇacikitsā | ādau bhagnaṃ viditvā tu secayecchītavāriṇā | paṃkenālepanaṃ kuryādbaṃdhanaṃ ca kuśānvitam || ālepanārthaṃ maṃjiṣṭhā madhukaṃ cāmlapeṣitam | śatadhautaghṛtonmiśraṃ śālipiṣṭaṃ ca lepanam || nyagrodhādikaṣāyaṃ tu suśītaṃ pariṣecanam | paṃcamūlīvipakkaṃ tu kṣīraṃ dadyātsavedane || sukhauṣṇamavacāryaṃ vā cukratailaṃ vijānatā | gṛṣṭikṣīraṃ sasarpiṣkaṃ madhurauṣadhasādhitam || saṃdhibhagne'sthibhaṃge ca pibetkṣīreṇa vā punaḥ | mūlaṃ sṛgālavinnāyāḥ pītvā māṃsarasena tu || taccūrṇīkṛtya saptāhādasthibhaṃgamapohati | ābhācūrṇaṃ madhuyutamasthibhaṃge tryahaṃ pibet | pītvā cāpi bhavetsamyagvajrasāranibhaṃ dṛḍham || lavaṇaṃ kaṭukaṃ kṣāramamlaṃ maithunapānakam | vyāyāmaṃ na ca seveta bhagno rūkṣānnameva ca || iti bhagnādhikāraḥ || yaḥ śophamāma iti pakvamupekṣate yo yo vā vraṇaṃ pracurapūyamasādhuvṛttaḥ | abhyaṃtaraṃ praviśati pravidārya tasya sthānāni pūrvavihitāni tataḥ sapūyaḥ || tasyātimātragamanādgatiriṣyate tu | nāḍīva yadvahati tena matā tu nāḍī || nāḍīnāṃ gatimanviṣya śastreṇotpāṭya karmavit| sarvaṃ vraṇakarma kuryācchodhanaṃ ropaṇādikam || nāḍīṃ vātakṛtāṃ sādhu pāṭitāṃ lepayedbhiṣak | pratyakpuṣpīphalayutaistilaiḥ piṣṭaiḥ pralepayet || paittikāṃ tilamaṃjiṣṭhānāgadaṃtīniśāhvayaiḥ | ślaiṣmikīṃ tilayaṣṭyāhvanikuṃbhāriṣṭasaiṃdhavaiḥ || śalyajāṃ tilamadhvājyairlepayecchinnaśodhinīm| āragvadhaniśākālācūrṇājyakṣaudrasaṃyutā || sūtravartirvraṇe yojyā śodhinī gatināśinī | vartīkṛtaṃ mākṣikasaṃprayuktaṃ nāḍīghnamayuktaṃ lavaṇottamaṃ ca | duṣṭe vraṇe yadvihitaṃ ca tailaṃ tatsevyamānaṃ gatimāśu haṃti|| jātyarkaśamyākakaraṃjadaṃtīsiṃdhūtthasauvarcalayāvaśūkaiḥ | vartiḥ kṛtā haṃtyacireṇa nāḍīṃsnukkṣīrapiṣṭāsahasaiṃdhavena|| kṛśadurbalabhīrūṇāṃ nāḍī marmāśritā tu yā | kṣāramātreṇa tāṃ chiṃdyānna śastreṇa kadācana || guggulustriphalāvyoṣaiḥ samāṃśaiścājyayojitaiḥ | nāḍīduṣṭavraṇaṃ haṃti bhagaṃdaravināśanaḥ || samūlapatrāṃ nirguṃḍīṃ pīḍayitvā rasena tu | tena siddhaṃ samaṃ tailaṃ nāḍīduṣṭavraṇāpaham || iti tomara0 vīrasiṃhāvaloke vraṇaśothabhagnanāḍīvraṇādhikāraḥ | atha bhagaṃdararogasya jyotiṣaśāstrābhiprāyeṇa hetumāha tatpratīkāraṃ ca yathoktaṃ jātake | kuṣṭhabhagaṃdararogairabhibhūtaṃ hrasvajīvitaṃ nidhanam | sarvāraṃbhavihīnaṃ janayati kitavaṃ sadā duṣṭam || aparaṃ ca rogairbhagaṃdarāyaiḥ saṃtapto baṃdhubhiḥ saha viruddhaḥ | karkaṭake dinanāthe bhaumena nirīkṣite rakheḥ putre || anyacca | kuṣṭhakaṃḍūvikāraiśca kṣayakuṣṭhabhagaṃdaraiḥ | gajādivāhanabhayaṃ bhaveccaṃdrāṃtage budhe