Siddhasara p411

p411

āragvadhādiko yojyaḥ śleṣmalāyāś ca sarvataḥ caturthe divase gacched ṛtau puṣṭo naro 'ṅganām sūnus syāc chukra-bāhulyād duhitā cārtave 'dhike lakṣmaṇāṃ vaṭa-śuṅgāṃ vā piṣṭvā kṣīreṇa bindukān caturaḥ putra-kāmāyāḥ savye nāsā-puṭe kṣipet bījapūraka-bījāni cūrṇaṃ vā nāga-kesarāt pītvājyenāpnuyād garbhaṃ ṛtau yoṣin narāśrayāt śyāma-stana-mukhīṃ nārīm antar-garbhāṃ vinirdiśet vyavāya-kheda-varjinyās tasyāḥ syād daurhṛdaṃ hitam bhayābhighāta-tīkṣṇoṣṇa-pānāśana-niṣevaṇāt sekāvagāhanālepāḥ śasyante tatra śīlitāḥ jīvanīyaiḥ śṛtaṃ kṣīraṃ pānaṃ caiva sa-śarkaram śveta-candana-kākolī-drākṣā-lāmajja-śarkarāḥ madhukotpala-mañjiṣṭhā-dhātakī-puṣpa-śarkarāḥ śarkarotpala-yaṣṭy-āhva-lodhra-candana-śārivāḥ garbha-srāve trayo yogāḥ pātavyās taṇḍulāmbhasā utpalādi-gaṇaṃ piṣṭaṃ payasā śarkarāvatā nyagrodhādeḥ pravālān vā tvag vā garbha-srutau pibet kvāthenotpala-kandānāṃ śāli-piṣṭaṃ sa-śarkaram pibed garbha-parisrāve tair vā kṣīraṃ prasādhitam garbhiṇī prathame māse dvitīye tṛtīye 'śanam svādu śītaṃ niṣeveta caturthe navanīta-vat pañcame sa-ghṛtaṃ kṣīraṃ ṣaṣṭha-saptamayoḥ pibet yavāgūṃ peśalāṃ yuktāṃ śvadaṃṣṭrā-siddha-sarpiṣā aṣṭame syāt payo yaṣṭī-pakvaṃ tailānuvāsanam śasyate 'taḥ paraṃ peyā snigdho jāṅgala-jo rasaḥ śiśor aṣṭāṅgulaṃ muktvā nāḍīṃ jātasya vardhayet sukhāmbu-kṣālitāsyasya lehaḥ syān madhu-sarpiṣī