Acarabhushana 10.p1.7

10.p1.7

tato mādhavīye gobhilaḥ-pibanti śiraso devāḥ pibanti pitaro mukhāt
madhyataḥ sarvagandharvā adhastātsarvajantavaḥ
tasmātsnāto na nirmṛjyātsnānaśāṭyā na pāṇinā || iti
tisraḥ koṭyo'rdhakoṭī ca yāvantyaṅgaruhāṇi vai
vasanti sarvatīrthāni tasmānna parimārjayet || iti
jābāliḥ-snānaṃ kṛtvā''rdravāsāstu viṇmūtraṃ kurute yadi
prāṇāyāmatrayaṃ kṛtvā punaḥ snānena śudhyati || iti
aṅgamārjane viśeṣamāhā''cāraratne devalaḥaṅgāni śaktau vastreṇa pāṇinā ca na mārjayet
dhautāmbareṇa vā proñchya bibhṛyācchuṣkavāsasī || iti
śītodakasnānāśaktau caivamuṣṇodakasnānamapi | tathā ca mādhavīye
ṣaṭtriṃśanmateāpaḥ svabhāvato medhyāḥ kiṃ punarvahnisaṃyutāḥ
tena santaḥ praśaṃsanti snānamuṣṇena vāriṇā || iti
etadāturasnānaviṣayam | yājñavalkyaḥvṛthā tūṣṇodakasnānaṃ vṛthā jāpyamavaidikam
vṛthā tvaśrotriye dānaṃ vṛthā bhuktamasākṣikam || iti
yadā tu nadyādyasaṃbhavastadā'nāturasyāpi uṣṇodakasnānamaniṣiddhamityāha yamaḥnityaṃ naimittikaṃ kāmyaṃ kriyāṅgaṃ malakarṣaṇam
tīrthābhāve tu kartavyamuṣṇodakaparodakaiḥ || iti
parodakaiḥ parakīyodakairityarthaḥ | tatraiva manuḥmṛte janmani saṃkrāntau śrāddhe janmadine tathā
aspṛśyasparśane caiva na snāyāduṣṇavāriṇā || ityādi
ayamabhisaṃdhiḥ-snānavidhinoṣṇodake prāpte tadapavādo vṛthā hyuṣṇodakasnānamityādiḥ | tadapavādo nityaṃ naimittikamityādiḥ | tadapavādo
mṛte janmanītyādirityācāraratnaḥ | mādhavīye marīciḥbhūmiṣṭhamuddhṛtaṃ vā'pi śītamuṣṇamathāpi vā
gāṅgaṃ payaḥ punātyāśu pāpamāmaraṇāntikam || iti