Acarabhushana 14.p1.23

14.p1.23

nyāyaśāstrādeḥ saṃgītakalādeścābhyāsaṃ vyudasya vedābhyāsasyaiva prathamaṃ
kathane kāraṇamāha mādhavīye vyāsaḥ—
nānyato jñāyate dharmo vedādvaiveṣa nirbhabhau
tasmātsarvaprayatnena dharmārthaṃ vedamāśrayet || iti
sa ca pañcadhetyāha dakṣaḥ—
vedasvīkaraṇaṃ pūrvaṃ vicāro'bhyasanaṃ japaḥ
taddānaṃ caiva śiṣyebhyo vedābhyāso hi pañcadhā || iti
mādhavīye kūrmapurāṇe'pi—
vedābhyāsaṃ tataḥ kuryātprayatnācchaktito dvijaḥ
japedadhyāpayecchiṣyāndhārayedvai vicārayet
avekṣeta ca śāstrāṇi dharmādīni dvijottamaḥ || iti
ādinā brahmaśāstram | śāstrayonitvāditiśrīmacchārīrakāparābhidhottaramīmāṃsātṛtīyādhikaraṇadvitīyavarṇakanyāyena tasyāpi vaidikasamadhigamyatvāttadarthameva sarvasatkarmānuṣṭhānādeḥ śrutyādicoditatvācca | ata eva
mādhavīye yājñavalkyaḥ—
veda eva dvijātīnāṃ niḥśreyasakaraḥ paraḥ | iti
brahmātmaikyameva niḥśreyasaṃ naivānyāditi tatraiva prapañcitam | evaṃ ca
vedābhyāse pañcavidhe'pi tadvidhāyake kaurmavākye japasyaiva prāthamyāttadparanāmakaṃ prathamaṃ brahmayajñaṃ vidhāya paścādadhyayanādhyāpanadhāraṇāvicāraṇaśāstrāvekṣaṇalakṣaṇaḥ sa kārya iti tātparyam