Acarendu 1.p33

1.p33

santaḥ śiṣṭasteṣāṃ svarūpamāha baudhāyanaḥ– śiṣṭāḥ khalu gatamatsarā nirahaṅkārāḥ kumbhīdhānyā1 alolupā dambhadarpalobhamohakrodhavivarjitāḥ| iti | laukikācārasyāpyāvaśyakatvamuktaṃ smṛtyantare– yadyapi syātsvayaṃ brahmā trailokyākarṣaṇakṣamaḥ | tathā'pi laukikācāraṃ manasā'pi na laṅghayet || iti| tathā– sāmayācāriko dharmo deśajātikulodbhavaḥ | grāmācārāḥ parigrāhyāḥ sarvatraiva yathoditam || iti| ācārārke bṛhaspatiḥ– dayā kṣamā'nasūyā ca śaucānāyāsasaṅgalam | akārpaṇyamaspṛhatvaṃ sarvasādhāraṇāni ca || sarveṣāṃ viprarājanyaviṭśūdrāṇāṃ dharmalakṣaṇānītyarthaḥ| dayādīnāṃ lakṣaṇamāha sa eva – pare vā bandhuvarge vā mitre dveṣṭari vā sadā| āpanne rakṣitavyaṃ2 tu dayaiṣā parikīrtitā || bāhye vā''bhyantare vā'pi duḥkha utpādite paraiḥ | na kupyati na vā hanti sā kṣamā parikīrtitā || guṇānna guṇino hanti stauti mandaguṇānapi | nānyadoṣeṣu ramate sā'nasūyā prakīrtitā || abhakṣyaparihāraśca saṃsargaścāpyaninditaiḥ | svadharme ca vyavasthānaṃ śaucametatprakīrtitam || śarīraṃ pīḍyate yena suśubhenāpi karmaṇā | atyantaṃ tanna kurvīta anāyāsaḥ sa ucyate