Acarendu 2.p60

2.p60

śaṅkho'pidarbhāḥ kṛṣṇājinaṃ mantrā brāhmaṇā haviragnayaḥ | ayātayāmānyetāni niyojyāni punaḥ punaḥ || bhādrāmāyāmapi kuśagrahaṇamuktaṃ madanaratne | atha niṣiddhakuśānāha hārītaḥpathi darbhāścitau darbhā ye darbhā yajñabhūmiṣu | prastarāsanapiṇḍeṣu ṣaṭkuśān parivarjayet || brahmayajñe ca ye darbhā ye darbhāḥ pitṛtarpaṇe | hatā mūtrapurīṣābhyāṃ teṣāṃ tyāgo vidhīyate || apūtā garbhitā darbhā ye ca darbhā nakhaiḥ kṣatāḥ | kvathitā agnidagdhāśca kuśān yatnena varjayet || kuśagrahaṇavidhimāha śaunakaḥśucau deśe śucirbhūtvā sthitvā pūrvottarāmukhaḥ | oṃkāreṇaiva mantreṇa kuśān spṛṣṭvā dvijottamaḥ || viriñcinā sahotpanna parameṣṭhinisargaja | nuda sarvāṇi pāpāni darbha svastikaro bhava || imaṃ mantraṃ samuccārya tataḥ pūrvottarāmukhaḥ | huṃphaṭkāreṇa mantreṇa sakṛcchittvā samuddharet || atha prayogaḥ | kuśasamīpe gatvā snātaḥ śuklavastradharaḥ prāṅmukha udaṅmukho vā sthitvā praṇavena darbhān spṛṣṭvā oṃ viriñcinā0 bhavediti (veti) mantramuccārya prāṅmukha udaṅmukho vopaviśya “oṃ huṃ phaṭ” iti sakṛcchittvā'cchinnāgrān śubhānupavitrānkuśānsamuddharet | iti kuśagrahaṇavidhiḥ | atha kuśābhāve tatpratinidhimāhātriḥkuśāḥ kāśā yavā dūrvā uśīrāśca sakundarāḥ | godhūmā vrīhayo muñjā daśa darbhāḥ sabalvajāḥ || kundaraḥ kandanāmnā prasiddhaḥ | balvajo dakṣiṇadeśe mola ityācāraprakāśe| balvajaṃ śucyārdratṛṇamityācārārke | godhūmādiśabdāstattattṛṇaparāḥ