Acarendu 4.p4

4.p4

snānavidhistatrātarmadhyāhnayogṛhasthaḥ kuryādekatatra vetyāśvalāyanapariśiṣṭe gṛhasthasya prātaḥsnānavaikalpikatvokteśca | uṣaḥkālaṃ tu viṣṇurāhanāḍikāḥ ṣaṭpañcāśatprātastvekādhiko'ruṇaḥ | uṣaḥkālo'ṣṭapañcāśaccheṣaḥ sūryodayaḥ smṛtaḥ || iti| saṅgrahe tu pañca pañca uṣaḥkāla ityuktam | śrāddhacandrikāyāṃ tu devīpurāṇe'ruṇodayo'pi snāna uktaḥcatasro ghaṭikāḥ prātararuṇodaya ucyate | yatīnāṃ snānakālastu gaṅgāmbusadṛśaḥ smṛtaḥ || yatayo niyatāḥ | yogayājñavalkyaḥlālāsvedasamākīrṇaḥ śayanādutthitaḥ pumān | svidyanti hi suṣuptasya indriyāṇi sravanti ca || aṅgāni samatāṃ yānti cottamānyadhamaiḥ saha | atyantamalinaḥ kāyo navacchidrasamanvitaḥ || sravatyeva divā rātrau prātaḥsnānaṃ viśodhanam | prātaḥsnānaṃ praśaṃsanti dṛṣṭādṛṣṭakaraṃ hi tat || sarvamarhati śuddhātmā prātaḥsnāyī japādikam | guṇā daśa snānaparasya sādho rūpaṃ ca tejaśca balaṃ ca śaucam | āyuṣyamārogyamalolupatvaṃ duḥsvapnaghātaśca tapaśca medhā || baudhāyanaḥsaptāhaṃ prātarasnāyī sandhyāhīnastribhirdinaiḥ | dvādaśāhamanagniḥ syāddvijaḥ śūdratvamāpnuyāt || taddoṣaparihārārthaṃ bhānuvāre'pi śasyate || bhānuvāre tvavaśyaṃ prātaḥsnānaṃ kāryamityartha ityācārārke | atha snānodakāni yogīnadyāṃ snānāni puṇyāni taḍāge madhyamāni ca | vāpīkūpe jaghanyāni gṛhe pratyavarāṇi ca || yājñavalkyaḥbhūmiṣṭhamuddhṛtātpuṇyaṃ tataḥ prasravaṇodakam | tato'pi sārasaṃ puṇyaṃ tasmānnādeyamucyate || tīrthatoyaṃ tataḥ puṇyaṃ tato gāṅgaṃ tu sarvataḥ || yogayājñavalkyaḥtrirātraphaladā nadyo yāḥ kāścidasamudragāḥ | samudragāstu pakṣasya māsasya saritāṃ patiḥ || trirātraphaladāstrirātravrataphaladāḥ | evaṃ māsapakṣayorapi | bhaviṣyottaregaṅgāyāṃ mausalaṃ snānaṃ prājāpatyasamaṃ viduḥ || iti| mahābhāratecāndrāyaṇasahasraṃ tu yaścaretkāyaśodhane | pibedyaścāpi gaṅgāmbhaḥ samau syātāṃ na vā samau || bhavanti nirviṣāḥ sarpā tathā tārkṣyasya darśanāt | gaṅgāyā darśanāttadvatsarvapāpaiḥ pramucyate || nāyamarthavādaḥ | taduktaṃ kaurmesnānamātreṇa gaṅgāyāḥ pāpaṃ brahmavadhodbhavam | durādharṣaṃ kathaṃ yāti cintayedyo vadedapi || tasyāhaṃ pradade pāpaṃ koṭibrahmavadhādbhavam | stutivādamimaṃ matvā kumbhīpākeṣu jāyate || ākalpanarakaṃ bhuktvā tato jāyeta gardabhaḥ || iti | saṅgame snānaṃ daśagodānaphaladam | taduktaṃ brāhmenadyāṃ pratyekaśaḥ snānaṃ bhavedgodānajaṃ phalam | gopradānaiśca daśabhiḥ snāne puṇyaṃ tu saṅgame || atra viśeṣaḥ prayāgamāhātmyekartaryāṃ na nimajjeta pṛthivyāṃ saṅgamāntare | prayāge na niṣedho'sti tatra tatraiva taccaret || kṛṣṇāmāhātmyesnānaṃ kṛtvā saṅgame tu saṅgameśaṃ prapūjya ca | sarvapāpavinirmukto gatiṃ prāpnoti śāśvatīm || saṅgamāduttare kūle pramāṇaṃ dhanuṣo dvayam | paścime dhanuṣaikena saṅgamaṃ pāpanāśanam || ṣaṭkūlamadhye yadi vā kṛtaṃ ca snānaṃ sadā sādhubhirmantravittamaiḥ | santarpya devāṃśca yavaiṛm̐ṣīn mudā pitṛṃstilairmantrapūtaiḥ kuśāgraiḥ || yamaḥnityaṃ naimittikaṃ caiva kriyāṅgaṃ malakarṣaṇam | tīrthābhāve tu kartavyamuṣṇodakaparodakaiḥ