Ahnikaprakasha 2.p2

2.p2

tataḥ saṃmārjanaṃ kuryānmṛdā pūrvaṃ tu mantravat || aśvakrānte rathakrānte viṣṇukānte vasundhare | uddhṛtā'si varāheṇa kṛṣṇena śatabāhunā || mṛttike tvāṃ ca gṛhṇāmi prajayā ca dhanena ca | mṛttike brahmadattā'si kāśyapenābhimantritā || mṛttike jahi naḥ sarvaṃ yanmayā duṣkṛtaṃ kṛtam | mṛttike dehi me puṣṭiṃ tvayi sarvaṃ pratiṣṭhitam || tataśca gomayenaivamagramagramiti bruvan | agramagraṃ carantīnāmoṣadhīnāṃ rasaṃ vane || tāsāmṛṣabhapatnīnāṃ pavitraṃ kāyaśodhanam | tvaṃ me rogāṃśca śokāṃśca nuda gomaya sarvadā || kāṇḍātkāṇḍāditi dvābhyāmaṅgamaṅgamupaspṛśet | kāṇḍākāṇḍātprarohanti paruṣaḥparuṣaspari | evāno dūrve pratanu sahasreṇa śatena ca || yā śatena pratanoṣiṃ sahasreṇa virohasi | tasyāste devīṣṭake vidhema haviṣā vayam || kṛtvaivaṃ mārjanaṃ mantrairaśvakrāntādibhistataḥ | īheta devīramṛtaṃ pārāvatasyarātiṣu || yeteśatamiti dvābhyāṃ tīrthānyāvāhayettataḥ | kurukṣetraṃ gayāṃ gaṅgāṃ prabhāsaṃ puṣkarāṇi ca || tato mahāvyāhṛtibhirgāyatryā cāpi mantrayet | āpohiṣṭhedamāpaśca drupadādiva ityapi || tathā hiraṇyavarṇābhiḥ pāvamānībhirantataḥ | tato'rkamīkṣya soṅkāraṃ nimajjyāntarjale budhaḥ || prāṇāyāmāṃśca kurvīta gāyatrīṃ cāghamarṣaṇām | yathoktaiḥ kṣobhitastaistu majjentrirdaṇḍavattataḥ