Ahnikaprakasha 5.p4

5.p4

śiroveṣṭanaṃ, taddhāraṇaṃ ca yāvatā kālena jalāpakarṣaṇaṃ bhavati tāvatkālameva | ācamanādau tanniṣedhāt | ata eva mahābhārate'pi jalakṣayanimittamevoṣṇīṣadhāraṇaṃ yudhiṣṭhireṇa kṛtamityuktam | yathā, āplutaḥ sādhivāsena jalena ca sugandhinā | rājahaṃsanibhaṃ prāpya uṣṇīṣaṃ śithilārpitam || jalakṣayanimittaṃ vai veṣṭayāmāsa mūrddhani | śithilārpitam agāḍhabandham | nāṅgebhyastoyamuddharediti | snānaśāṭīpāṇibhyāmiti śeṣaḥ | snāto nāṅgāni nirmṛjyāt snānaśāṭyā na pāṇinā | iti viṣṇupurāṇavacanāt | pūrvadhṛtaṃ parihitam | mārkaṇḍeyapurāṇe, avamṛjyāt na ca snāto gātrāṇyambarapāṇinā | ambaraṃ snānaśāṭī | pūrvalikhitaviṣṇupurāṇavacanāt | gobhilo'pi, pibanti śiraso devāḥ pibanti pitaro mukhāt | madhyataḥ sarvagandharvā adhastātsarvajantavaḥ || tasmātsnāto na pramṛjyātsnānaśāṭyā na pāṇinā| iti| evamtisraḥ koṭyo'rddhakoṭī ca yāvantyaṅgaruhāṇi vai | vasanti sarvatīrthāni tasmānna parimārjayet || iti vyāsavacanaṃ, snātvā na gātramavamṛjyādityādihārītādivacanaṃ ca snānaśāṭyādinā na parimārjayediti vyākhyeyam | yogiyājñavalkyaḥ, yāvaddevānṛṣīṃścaiva pitṝṃścaiva na tarpayet | tāvanna pīḍayedvastraṃ yena snāto, na codake | niṣpīḍayati yaḥ pūrvaṃ snānavastraṃ tu tarpaṇāt || nirāśāḥ pitarastasya yānti devā maharṣibhiḥ