Sadacarasmriti 1.p52

1.p52

ācamya jalamādāya pātre vāmakare'thavā | gāyatryā vā'tha mūlena 1trivāramabhimantrayet | tajjalaṃ prokṣayed gātre darbhairvā tulasīdalaiḥ | tarjanīmadhyamābhyāṃ vā ṛcenābdaivatena vai | bhūmau śirasi cākāśe ākāśe bhuvi mastake | mastake ca tathākāśe bhūmau ca navadhā kṣipet | abdaivataḥ smṛto mantra āpo hiṣṭheti vai ṛcaḥ | trirāvṛtya kṣipettoyaṃ pratyṛcaṃ navadhā dvijaḥ | ākāśaṃ hṛdayaṃ proktaṃ bhūmiḥ pādāviti smṛtam | tata 2ācamya vidhivat kuryāt sandhyādikarma ca | yadāpyetanna śaknoti vṛddho vāpyatha 3vā''turaḥ | śayāno'pi prakurvīta dhyānasnānamatandritaḥ | sarvalakṣaṇasaṃyuktāṃ manmūrtiṃ sveṣṭadevatām || mastakopari tāṃ dhyāyet tatpādābhyāṃ vinissṛtām | brahmaṇā 4kṣālyamānāṃ ca gaṅgāṃ tripathagāminīm | dhṛtāṃ śivena śirasā tato'pi nissṛtāṃ vahiḥ | nipatantīṃ svake mūrdhni plāvayantīṃ muhurmuhuḥ | sarvāṅgāni tataḥ samyak ācamya śucitāṃ vrajet | snāto'pi 5vidhivacchakto vāruṇena jalena vā | mantrasnānaṃ tathā dhyānasnānaṃ kuryācca nityadā | jalasnānamatho vakṣye siddhyarthaṃ sarvakarmaṇām || iti bhūmisthamuddhṛtāt puṇyaṃ tataḥ prasravaṇodakam | tato'pi sārasaṃ puṇyaṃ tasmānnādeyamucyate | tīrthatoyaṃ tataḥ puṇyaṃ tato gāṅgaṃ tu sarvataḥ || iti