Smritiratnakara 1.p2.6

1.p2.6

vasiṣṭhopi-traividyavṛddhāṃ yaṃ brūyurdharmaṃ dharmavido janāḥ | patane pāvane caiva sa dharmo nātra saṃśayaḥ || iti. tacca śrutyādivatpramāṇamityāha yamaḥ-vedāḥ pramāṇaṃ smṛtayaḥ pramāṇaṃ dharmārthayuktaṃ vacanaṃ pramāṇam | yasya pramāṇam na bhavetpramāṇaṃ kastasya kuryādvacanaṃ pramāṇam || iti. yasya śrutyādikaṃ pramāṇaṃ na bhavati, na tasya 'vākyaṃ pramāṇam; atastatparityājyamityābhiprāyaḥ | ataeva pracetāḥ-amīmāṃsāvidviśāstrā ye cānye vedavarjitāḥ| yatte brūyurna tatkuryādvedāddharmo vidhīyate || iti. parāśaraśca-traividyau hetukastarkī hyaṅgaviddharmapāragaḥ | trayaścāśramiṇaḥ pūrve parṣadeṣā daśāvarā || avratānāmamantrāṇāṃ jātimātropajīvinām | sahasraśassametānāṃ pariṣattvaṃ na vidyate || yāṃ yāṃ vedavido brūyustrayopyenasamunmicchatim | sā teṣāṃ pāvanāya syātpavitraṃ viduṣāṃ hi vāk || iti. etadvacanamatyalpapāpaviṣayam | anyatra-pātake tu śataṃ parṣatsahasraṃ mahadādiṣu | upapātake tu pañcāśatsvalpe svalpaṃ tathā bhavet || ityuktaṃ draṣṭavyam | bodhāyanaḥbahudvārasya dharmasya sūkṣmā duranugā gatiḥ | tasmādvācyo hyekena bahujñenāpi saṃśaye || iti. atra hetukādīnāṃ lakṣaṇaṃ saṃjñāprakaraṇe draṣṭavyam | yājñavalkyaḥajñebhyo granthina śreṣṭhā granthibhyo dhāriṇo varāḥ| dhāribhyo jñāninaḥ śreṣṭhā jñānibhyo vyavasāyinaḥ || ekopi vedaviddharma yaṃ vipaśyedvicakṣaṇaḥ | sa eva paramo dharmo nājñānāmuditoditaiḥ || bodhāyanopi-dharmaśāstrarathārūḍhā vedakhaṅgadharā dvijāḥ| krīḍārthamapi yaṃ brūyussa dharmaḥ paramo mataḥ|| iti.