Smritiratnakara 2.p68.4

2.p68.4

uttarīyavyatītasya samastā niṣphalāḥ kriyāḥ | nāradaśca-śvaśūdrapatitāṃścaiva rāsabhaṃ ca rajasvalām | dṛṣṭvā toyamupaspṛśyābhāṣya snātvā punarjapet || pracāre maithune home mallāre dantadhāvane | snānabhojanajapyeṣu maunaṃ kuryāttathāṣṭasu || candrikāyām-japakāle na bhāṣeta vṛtahomādikeṣu ca | eteṣvevāvasaktaṃ tu yadyāgaccheddvijottamaḥ || abhivādya tato vipraṃ yogakṣemaṃ ca kīrtayet | dhāvatastiṣṭhata ścaiva svecchayā karma kurvataḥ || saṃdhyāṃ caivopavītena japahojādi--iti gāyatrīvyatiriktamantraviṣayam | tatra sthitereva vidhānāt | yattvidaṃ mānacam-ārdravāsāstu yaḥ kuryājjapahomapratigraham | sarvaṃ tadrākṣasaṃ vidyādbahirjānu ca yatkṛtam || iti | etatsthalaviṣayam || yadi syātklinnavāsā vai vārimadhyagato japet | anyathā tu śucau bhūmyāṃ darbheṣu susamāhitaḥ || iti vyāsasmaraṇāt | yattu gobhiloktam-matimān na kadācittu gāyatrīmudake japet | gāyatryagnimukhī proktā tasmāduttīrya tāṃ japet || idaṃ sarvadā jale gāyatrījapaniṣedhaparam | ato vyāsavacanamāpadviṣayam | vyāsaḥ-caṇḍālāśucipatitan dṛṣṭvācamya punarjapet | taireva bhāṣaṇaṃ kṛtvā snātvācamya punarjapet || aśucayaḥ śvaśūdrodakyāśauciprabhṛtayaḥ | śāṇḍilyaḥ-pradakṣiṇe praṇāme ca pūjāyāṃ havane jape | na kaṇṭhāvṛtavastraḥ syāddarśane gurudevayoḥ || ācāryamekabhaktaṃ ca bhagavanmaṃdiraṃ jalam | aśvatthamagnimarkaṃ ca pṛṣṭhīkṛtya japenna tu || (yamaḥ-aśvatthamagnimarkaṃ ca somaṃ gurumatho jalam | pṛṣṭhīkṛtya japanvipro yāti sthāvaratāṃ tataḥ || ) nābheradhaḥ svakāyaṃ tu spṛṣṭvā prakṣālayetkaram !