Shuddhikaumudi (Govindananda Kavikankanacarya) 1.p184

1.p184

ata ūrddhaṃ ṣaṇmāsādūrddhaṃ daśarātramiti svajātyuktāśaucopalakṣaṇaṃ sapiṇḍānāṃ ṣaṇmāsādūrddhaṃ sadyaḥśaucavidhānāt ṣaṇmāsāt pūrvvamaśaucābhāva eva | jātamṛte mṛtajāte vā kulasya trirātramiti hārītavacanamapi saptamāṣṭamamāsīyagarbhapāte yatheṣṭācaraṇaśīlajñātiviṣayam | yatheṣṭācaraṇaśīlastu sarvvāśitve sarvvavikrayitve sati vihitakarmmānuṣṭhānaśīlaḥ | yadā tu saptamāṣṭamamāsīyo garbhaḥ patito daivavaśāñjīvati tadā sapiṇḍānāmapi sampūrṇāśaucam | dvitīyādidine mṛte tu pūrvvoktabālādyaśaucaviṣayatvena mātāpitroraṅgāspṛśyatvayuktaṃ sampūrṇāśaucaṃ sapiṇḍānāntu sadyaḥśaucameva | prathamadine jātamṛte tu piturapi sadyaḥśaucam— strīṇāntu patito garbhaḥ sadyojāto mṛto'thavā | vastrādyairbhūṣitaṃ kṛtvā nikṣipettantu kāṣṭhavat || khanitvā śanakairbhūmau sadyaḥśaucaṃ vidhīyate | ityādipurāṇavacane sadyojātamṛtasya sadyaḥśaucavidhānāt | mātustu pūrvvoktakūrmapurāṇavacanāt sampūrṇameva | atyantanirguṇasapiṇḍānāmekarātraṃ yatheṣṭācaraṇānāṃ trirātramityapi prathamadinamṛtaviṣaye boddhavyam | dvitīyamāse viśeṣamāha marīciḥ— garbhasrutyāṃ yathāmāsamacire tūttame trayaḥ | rājanye ca caturātraṃ ca vaiśye pañcāhameva ca || aṣṭāhena tu śūdrasya śuddhireśā prakīrttitā