Danamayukha 3.p115

3.p115

athātmapratikṛtidānam || bhaviṣyottare | dānakālaḥ sadā tasyetyuktvā, haimīṃ pratikṛtiṃ bhavyāṃ kārayitvātmano nṛpa | abhīṣṭavāhanagatāmiṣṭālaṅkārabhūṣitām || abhīṣṭalokasahitāṃ sarvopaskarasaṃyutām || abhīṣṭalokaḥ priyajanaḥ | netrapaṭṭapaṭīvastraiśchāditāṃ sragvibhūṣitām | kuṅkumenānuliptāṅgīṃ karpūrāguruvāsitām || strī vā dadyāttu śayane śayitāṃ kārayet svayam | yadyadiṣṭatamaṃ kiñcittatsarvaṃ pārśvato nyaset || upakārakaṃ strīṇāṃ puruṣāṇāṃ ca yadbhavet | tatsarvaṃ sthāpayet pārśve svayaṃ saṃcintya cetasi || etatsarvaṃ melāyitvā sve sve sthāne niyojayet || oṃm adyetyādi sāġraśatavarṣaparyyantaṃ surasāhityena svargādīṣṭabhogottarajanmanīṣṭabandhujanā'viyogakāma ātmapratikṛtidānaṃ kariṣya iti saṅkalpya, pūjayitvā lokapālān grahān devīṃ vināyakam | devī durgā | tataḥ śuklāmbaraḥ snātvā gṛhītakusumāñjaliḥ | imamuccārayenmantraṃ viprasya purataḥ sthitaḥ || ātmanaḥ pratimā ceyaṃ sarvopakaraṇairyutā | sarvaratnasamāyuktā tava vipra niveditā || ātmā śambhuḥ śivaḥ śauriḥ śakraḥ suragaṇairyutaḥ | tasmādātmapradānena mama cātmā prasīdatu || ityuktvā māsapakṣādi collikhya pūrvoktaṃ sāgratyādikānāṃ saṅkalpavākyamuktvā imāmātmapratimāṃ sopaskarāmamukaśarmaṇe'mukagotrāya tubhyamahaṃ sampadade, ityuccārya tato dadyād brāhmaṇāya yudhiṣṭhira brāhmaṇaścātha gṛhṇāti, ko'dāditi ca kīrttayet || tataḥ pradakṣiṇīkṛtya praṇipatya visarjayet || vidhinānena rājendra dānametat prayacchati | yaḥ pumānatha vā nārī śrṛṇu tatphalamāpnuyāt || sāgraṃ varṣaśataṃ bhavyaṃ sarvalokaiḥ surairvṛtaḥ | abhīṣṭaphaladānena cābhīṣṭaphalabhāgbhavet || yatraivotpadyate jantuḥ prāptaḥ karmakṣayaṃ kṣaṇam | tatraiva sarvakāmānāṃ phalabhāg jāyate nṛpa || iṣṭabandhujanaiḥ sārddhaṃ na viyogaṃ kadācana || prāpnoti puruṣo rājan svargamānantyamaśnuta iti || ityātmapratimādānam