Danamayukha 3.p41

3.p41

atha dharādānaṃ mātsye | athātaḥ sampravakṣyāmi mahādānamanuttamam | pāpakṣayakaraṃ nṛṇāmamaṅgalyavināśanam || kārayet pṛthivīṃ haimīṃ jambūdvīpānukāriṇīm| maryādāmarvatavatīṃ madhye merusamanvitām || lokapālāṣṭakopetāṃ navavarṣasamanvitām | naṃdīnadasamāpetāmante sāgaraveṣṭitām || mahāratnasamākīrṇāṃ vasurudrārkasaṃyutām || hemnaḥ palasahasreṇa tadarddhenātha śaktitaḥ | śatatrayeṇa vā kuryād dviśatena śatena vā || kuryāt pañcapalādūrdhvamaśakto'pi vicakṣaṇaḥ || palasahastrādimānaṃ pratimādisahitāyāḥ pṛthivyāḥ | tulāpuruṣavat kuryāllokeśā''vāhanaṃ tataḥ| ṛtviṅmaṇḍapasambhārabhūṣaṇācchādanādikam | vedyāṃ kṛṣṇājinaṃ kṛtvā tilānāmupari nyaset || tathāṣṭādaśa dhānyāni rasām̐śca lavaṇādikān | tathāṣṭau pūrṇakalaśān samantāt parikalpayet || vitānakaṃ ca kauśeyaṃ phalāni vividhāni ca | ityevaṃ racayitvā tāmadhivāsanapūrvakam || puṇyaṃ kālamathāsādya || mantrāḥ prayoge jñeyāḥ | evamuccārya tāṃ devīṃ brāhmaṇebhyo nivedayet | dharārddhaṃ vā caturthāgaṃ gurave vinivedayet || śeṣaṃ caivātha ṛtvigbhyaḥ praṇipatya visarjayediti || ekahastena karttavyā caturasrā suśobhaneti hemādrirūpanārāyaṇādibhiścaturasroktā | trikoṇā dānasaukhye dāmodarīye ca | parimaṇḍale'nye | anena vidhinā yastu dadyāddhemadharāṃ śubhām | puṇyakāle tu saṃprāpte sa padaṃ yāti vaiṣṇavam || vimānenārkavarṇena kiṅkiṇījālamālinā | nārāyaṇapuraṃ gatvā kalpatrayamaso ramet || putrapautraprapautrāṃśca tārayedekaviṃśatimiti || pṛthivīṃ haimīṃ kuryādityukte saptadvīpavatyāḥ karaṇaprasaṅge, jambūdvīpānukāriṇīmiti viśeṣaṇam | jambūdvīpānusādṛśye'pi nānāparvatasarovarādyānvinānukāritvaprasaṅge maryādāparvatavatīmityuktam | tāvatā merorakaraṇaprasaṅge madhye merusamanvitāmityuktam | jambūdvaipalakṣaṇaṃ viṣṇupurāṇe | navavarṣaṃ tu maitreya jambūdvīpamidaṃ mayā | lakṣayojanavistāraṃ saṅkṣepāt kathitaṃ tava || jambūdvīpaṃ samāvṛtya lakṣayojanavistaraḥ | maitreya valayākāraḥ sthitaḥ kṣīrodadhirbahiḥ || jambūdvīpaṃ samastānāṃ dvīpānāṃ madhyataḥ sthitam | tasyāpi merurmaitreya madhye kanakanirmitaḥ || caturaśītisāhasrairyojanairasya cocchrayaḥ | praviṣṭaḥ ṣoḍaśādhastāddvātriṃśanmūrdhni visṛtaḥ || mūle ṣoḍaśasāhasro vistārastasya sarvataḥ || tathā, meroścaturdiśaṃ tatra navasāhasravistṛtaḥ | ilāvṛtaṃ mahābhāga catvāraścātra parvatāḥ || viṣkambhā racitā meroryojanāyatavistṛtāḥ || pūrveṇa mandaro nāma dakṣiṇe gandhamādanaḥ | vaibhrājaḥ paścime pārśve supārśvaścottare smṛtaḥ || maryādāparvatāstu brahmāṇḍe | jāṭharo devakūṭaśca pūrvasyāṃ diśi parvatau | tau dakṣiṇottarāyāmāvānīlaniṣadhāyatau || kailāso himavāṃścaiva dakṣiṇe varṣaparvatau | pūrvapaścāyatāvetāvarṣṇavāntarvyavasthitau || triśṛṅgo jāradhiścaiva uttare varṣaparvatau | pūrvapaścāyatāvetāvarṇavāntarvyavasthitau || niṣadhaḥ pārijātaśca paścime varṣaparvatau | tau dakṣiṇottarāyāmāvānīlaniṣadhāyatau||ilāvṛtasyobhayapārśvavarttinau nīlaniṣadhau dvau parvatau dairghyeṇa lakṣayojanau | varṣāṇyapyuktāni brahmāṇḍe | uttaraṃ yat samudrasya himādreścaiva dakṣiṇe | etadvai bhārataṃ nāma bhāratī yatra santatiḥ || bhārataṃ prathamaṃ varṣaṃ tataḥ kimpuruṣaṃ smṛtam | harivarṣaṃ tathaivānyaṃ merordakṣiṇato dvija || ramyakaṃ cottare varṣaṃ tasya cānu hiraṇmayam| uttarāḥ kuravaścaiva yathā vai bhārataṃ tathā || meroḥ pūrveṇa bhadrāśvaṃ ketumālaṃ tu paścime | varṣe dve tu samākhyāte tayormadhyamilāvṛtam || navasāhasrameteṣāmekaikaṃ dvijasattama