Danamayukha 3.p83

3.p83

pavitrābhyo namo namaḥ | brāhmaṇāścaiva gāvaśca kulamekaṃ dvidhā kṛtam | ekatra mantrāstiṣṭhanti havirekatra tiṣṭhatīti yamoktāṃ gomatīṃ vidyāṃ japet || mahābhārate'pi gomatī | gāvo māmupatiṣṭhantu hemaśṛṅgāḥ payomucaḥ | surabhyaḥ saurabheyyaśca saritaḥ sāgaraṃ yathā || gā vai paśyāmyahaṃ nityaṃ gāvaḥ paśyantu māṃ sadā | gāvo'smākaṃ vayaṃ tāsāṃ yato gāvastato vayamiti || gāvo mamāgrataḥ santu gāvo me santu pṛṣṭhataḥ | gāvo me hṛdaye santu gavāṃ madhye vasāmyahamiti paṭhitvā dhenuṃ dvijaṃ ca pradakṣiṇīkṛtya dadyādityapi vadanti | dakṣiṇāmāha vasiṣṭho godānaprakaraṇe | suvarṇaṃ paramaṃ dānaṃ suvarṇaṃ dakṣiṇā parā | suvarṇaṃ pāvanaṃ prāhuḥ parimāṇaṃ paraṃ tatheti || yajamānastato dadyādyathāśaktyā tu dakṣiṇāmiti | tadaśaktaparamiti madanaḥ || atha mātsye hemaśṛṅgī| daśa sauvarṇike śṛṅge khurāḥ pañcapalānvitāḥ | pañcāśatpalikaṃ kāṃsyaṃ tāmraṃ cāpi tathaiva ca || dātā'syāḥ sarvamāpnoti yāvadābhūtasaṃplavam || suvarṇamatra dakṣiṇā | iti hemaśṛṅgīdānam || śivāya viṣṇave vāpi yastu dadyāt payasvinīm | dhenuṃ snānopahārārthaṃ sa paraṃ brahma gacchatīti, skānde devatābhyo godānam| savṛṣaṃ gośataṃ dadyācchivāyātīva śobhanam| triḥsaptakulajaiḥ sārddhaṃ śṛṇu tatpadamāpnuyādityādinā śivadharmoktaṃ śivāya vṛṣā'dhikagośatadānam| devatābhyo dāne devataiva saṃpradānaṃ, na brāhmaṇaḥ | dattaṃ ca tattaddevatāyatane dakṣiṇabhāge sthāpyamiti dānasaukhye || athobhayatomukhī || taddānakālaḥ skānde | arddhaprasūtāṃ gāṃ dadyāt kālādi na vicārayet | kālaḥ sa eva grahaṇe yadā sā dvimukhī tu gauḥ || mātsye | rukmaśṛṅgīṃ raupyakhurāṃ muktālāṅgūlabhūṣitām | kāṃsyopadohanāṃ rājan savatsāṃ dvijapuṅgave || prasūyamānāṃ yo dadyāddhenuṃ draviṇasaṃyutām || yāvadvatso yonigato yāvadgarbhaṃ na muñcati | tāvadgauḥ pṛthivī jñeyā saśailavanakānanā || devalaḥ | alaṅkṛtyoktavidhinā suvarṇātripalānvitā | dātavyā dvipalā madhyaikapalā kanyasī matā || vārāhe | yaścobhayamukhīṃ dadyāt prabhūtakanakānvitām | taddinaṃ pāyasāhāraḥ payasā vā'tivāhayet || suvarṇasya sahasreṇa tadarddhenāpi vā punaḥ | tasyāpyarddhaśataṃ vā'tha pañcāśacca tathārddhakam || yathāśaktyā'pi dātavyaṃ vittaśāṭhyavivarjitam || yogī | savatsā romatulyāni yugānyubhayatomukhī | dātā'syāḥ svargamāpnoti pūrveṇa vidhinā dadat || mātsye | golokaḥ sulabhastasya brahmalokaśca pārthiva || striyaśca taṃ candrasamānavaktrāḥ prataptajāmbūnadatulyavarṇāḥ oṃ mahānitambastanamadhyavṛttā bhajantyajasraṃ nalinābhanetrāḥ