Danamayukha 3.p97.2

3.p97.2

atra sakalapātakanāśanapūrvakahaṃsasārasayuktakiṅkiṇījālamālyarkavarṇavimānakaraṇakaśaṅkaralokāgamanapūrvaka-siddhavidyādharārcitatvaviśiṣṭapitṛsahitabhūtasaṃhārā'vadhikavicaraṇakāma iti dānavākyam || atha ratnācalaḥ || pādme, athātaḥ saṃpravakṣyāmi ratnācalamanuttamam | muktāphalasahasreṇa parvataḥ syādihottamaḥ | madhyamaḥ pañcaśatikāstriśatā cādhamaḥ smṛtaḥ | caturthāṃśena viṣkambhaparvatāḥ syuḥ samantataḥ || pūrveṇa vajragomedaurdakṣiṇenendranīlakaiḥ || vajragomedaurityanantaraṃ mandara iti śeṣaḥ | padmarāgayutaiḥ kāryoṃ vidvadbhirgandhamādanaḥ | vaiḍūryavidrumaiḥ paścāt saṃmiśro vipulācalaḥ || padmarāgaiḥ sasauparṇairuttareṇa tu vinyaset || supārśvamiti śeṣaḥ | vajragomedaiḥ samasaṃkhyaḥ | samaṃ syādaśrutitvāditi nyāyāt | evamuttaratrāpi jñeyam | dhānyaparvatavaccheṣamatrāpi parikalpate | tadvadāvāhanaṃ kuryād grahadevām̐śca kāñcanān || pūjayet puṣpapānīyaiḥ prabhāte ca visarjanam || dānāntaramiti śeṣaḥ | pūrvavadgurukṛtvigbhya imānmantrānudīrayet || gurukṛtvigbhyo dānāyeti śeṣaḥ | yathā devagaṇāḥ sarve ratneṣveva vyavasthitāḥ | tvaṃ ca ratnamayo nityamataḥ pāhi mahācala | yasmādratnaprasādena dṛṣṭiṃ prakurute hariḥ | mahāratnaprasādena tasmānnaḥ pāhi sarvataḥ || atrāpyupakramādārabhya visarjanādīnāṃ vyutkramoktāvapi cānyaparvatavadātideśikaḥ kramo jñeyaḥ | anena vidhinā yastu dadyādratnamahāgirim | sa yāti vaiṣṇavaṃ lokamamareśvarapūjitaḥ || yāvatkalpaśataṃ sāgraṃ vasediha narādhipa | rūpārogyaguṇopetaḥ saptadīpā'dhipo bhavet ||