Kalamayukha 13.p11

13.p11

ekādaśyāṃ dinakṣaye upavāsaṃ karoti yaḥ | tasya putrā vinaśyanti maghāyāṃ piṇḍado yathā || iti | dinakṣayaṃstu pādme— dvau tithyantāvekavāre yasminsa syāddinakṣayaḥ || iti | dinakṣayeṃ ca upavāsasya niṣedhaḥ sa nirāhārasyaiva | tathā ca vāyavīye— upavāsaṃniṣedhe tu bhakṣyaṃkiñcitprakalpayet | na duṣyatyupavāsena upavāsaphalaṃ labhet | evaṃ kṛṣṇaikādaśyādāvapi gṛhasthasya | tatraiva—naktaṃ haviṣyānnamanodanaṃ vā phalaṃ tilāḥ kṣīramathāmbu vā'jyam || yatpaṃcagavyaṃ yadivā'pi vāyuḥ praśastamatrottaramuttaraṃ ca || iti | vrate viśeṣaḥ smṛtyantare— daśamyaryādi mahīpāla tridinaṃ parivarjayet | gandhatāmbūlapuṣpādi strīsaṃbhogaṃ mahāyaśāḥ || strīsaṃbhoganiṣedhastu ṛtukālādanyatreti āhnikānta uktam | skānde—kāṃsyaṃ māṃsaṃ masūraṃ ca kṣaudraṃ cānṛtabhāṣaṇam | punarbhojanamāyāsaṃ daśamyāṃ parivarjayet || kaurme— kāṃsyaṃ māṃsaṃ masūraṃ ca caṇakānkoradūṣakān | śākaṃ madhu parānnaṃ ca tyajedupavasan striyam || mātsye— kāṃsyaṃ māṃsaṃ surāṃ kṣaudraṃ tailaṃ vitathabhāṣaṇam | vyāyāmaṃ ca pravāsaṃ ca divāsvāpaṃ ca maithunam || tilapiṣṭaṃ masūraṃ ca daśamyādiṣu varjayet | daśamīṃ prakṛtya nāradīye— 'akṣāralavaṇāḥ sarve haviṣyānnaniṣeviṇaḥ | avanītalaśayanāḥ priyasaṅgavivarjitāḥ || anyatrāpi— daśamyāmekabhaktaṃ tu kurvīta niyatendriyaḥ | ācamya dantakāṣṭhaṃ tu khādeta tadanantaram || tataścānantaraṃ viprabrahmacārī jitendriyaḥ | rātriṃ nayettataḥ paścātprātaḥ snātvā samāhitaḥ || upavāsaṃ tu saṃkalpya mantrapūtaṃ jalaṃ pibet |daśamyāmekabhaktaṃ tu kāmyaikādaśīparam | sāyamādyantayorahnoḥ sāyaṃ prātaśca madhyame | upavāsaphalaṃ prepsurjahyādbhuktacatuṣṭayam || atha nityopavāsī cetsāyaṃ prātarbhujikriyām | varjayedbhaktimān vipraḥ saṃprāpte harivāsare