Kalamayukha 3.p8

3.p8

etanmaithunamaṣṭāṅgaṃ pravadanti manīṣiṇaḥ || iti | devalaḥ—strīṇāṃ tu prekṣaṇātsparśāttābhiḥ saṃkethanādapi | vipadyate brahmacaryaṃ na dāreṣvṛtusaṃgamāt || ityapi kvacitpāṭhaḥ | viṣṇudharmottare— tajjapastavanadhyānaṃ tatkathāśravaṇādikam | tadarcanaṃ ca tannāmakīrttanaṃ śravaṇādayaḥ || upavāsavatāmete guṇāḥ proktā manīṣibhiḥ || tacchabdenopāsyā devatā vratadevatā vā | devalaḥ—brahmacaryamahiṃsā ca satyamāmiṣavarjanam | vrateṣvetāni catvāri karttavyānīha sūribhiḥ || āmiṣaṃ māṃsam | āmiṣaṃ dṛtipānīyaṃ gauvarjaṃ kṣīramāmiṣam | masūramāmiṣaṃ sasye phale jambīramāmiṣam || āmiṣaṃ śuktikācūrṇaṃmāranālaṃ tathāmiṣam | iti smṛtyantaroktam | padmapurāṇe— aṣṭaitānyavrataghnāni āpo mūlaṃ phalaṃ payaḥ | havirbrāhmaṇakāmyā ca gurorvacanamauṣadham || payaḥpānādīnāmavrataghnatvaṃ strībālādyatyantapīḍitavrataviṣayam | sarvabhūtabhayaṃ caiva pramādo guruśāsanam | avrataghnāni paṭhyante sakṛdetāni śāstrataḥ || sarvabhūtabhayaṃ sarvebhyo bhūtebhyo bhayam | vratādau parānnabhojananiṣedho devīpurāṇe— vrate ca tīrthe'dhyayane śrāddhe'pica viśeṣataḥ | parānnabhojanāddevi yasyānnaṃ tasya tatphalam || iti | hemādrau pādme— garbhiṇī sūtikādiśca kumārī vā'tha rogiṇī | yadā śuddhā tadā'nyena kārayetprayatā svayam || iti