Kalamayukha 5.p1

5.p1

atha dvitīyā | sā tu paraiva | yugmāgnīti vacanāt , ekādaśyaṣṭamī ṣaṣṭhī dvitīyā ca caturdaśī | trayodaśī amāvāsyā upoṣyāḥ syuḥ parānvitāḥ || iti viṣṇudharmottarācca | atra viśeṣaḥ skānde— āṣāḍhasya site pakṣe dvitīyā puṣyasaṃyutā | tasyāṃ rathe samāropya rāmaṃ vai bhadrayā saha || yātrotsavaṃ pravarttyātha prīṇayeta dvijānbahūn | bhadrā subhadrā || śrāvaṇakṛṣṇadvitīyā bṛhattapocyate | sā pūrvaviddhā grāhyā | tadāha saṃvarttaḥ— kṛṣṇāṣṭamī bṛhattapā sāvitrī vaṭapaitṛkī | kāmātrayodaśī rambhā upoṣyāḥ pūrvasaṃyutāḥ || iti | upoṣyāḥ sevanīyā iti | kārtikaśukladvitīyā yamadvitīyācyate | sā'parāhṇavyāpinī grāhyā | karmakālavākyāt | taduktaṃ skānde— ūrje śukladvitīyāyāmaparāhṇe'rcayedyamam | snānaṃ kṛtvā bhānujāyāṃ yamalokaṃ na paśyati || ūrje śukladvitīyāyāṃ pūjitastarpito yamaḥ | veṣṭitaḥ kiṅkarairhṛṣṭaistasmai yacchati vāñchitam || bhaviṣyottare'pi— kārtike śuklapakṣasya dvitīyāyāṃ yudhiṣṭhira