Kalamayukha 9.p1

9.p1

atha ṣaṣṭhī | sā tu sarveṣūpavāsavratādiṣu skandavratātiriktā saptamīyutaiva grāhyā | 'ṣaṇmunyoḥ ' iti yugmavākyāt | mādhavīye skānde'pināgaviddhā na kartavyā ṣaṣṭhī caiva kadācana | saptamīsaṃyutā kāryā ṣaṣṭhī dharmārthacintakaiḥ || iti | atra pañcamīvedhaḥ ṣaṇmuhūrtātmako jñeyaḥ | 'nāgo dvādaśanāḍībhirdūṣayatyuttarāṃ tithim ' iti vacanāt | tena ṣaṇmuhūrtanyūnapañcamīyoge pūrvaiva | asyāmeva ravivāsarayoge rolārkayātroktā kāśīkhaṇḍekṛtāni yāni pāpāni naraiḥ saṃvatsarādapi | naśyanti kṣaṇatastāni ṣaṣṭhyarke loladarśanāt || lolo rolārkaḥ | vārṣikātrāpyuktā tatraivamārgaśīrṣasya saptamyāṃ ṣaṣṭhyāṃ vā ravivāsare | vidhāya vārṣikīṃ yātrāṃ naraḥ pāpātpramucyate || iti | āṣāḍhaśuklaṣaṣṭhī skandaṣaṣṭhītyucyate | sā pañcamīyutā grāhyā | taduktaṃ skāndekṛṣṇāṣṭamī skandaṣaṣṭhī śivarātriścaturdaśī | etāḥ pūrvayutāḥ kāryāstithyante pāraṇaṃ bhavet || iti | bhādrakṛṣṇaṣaṣṭhī yogaviśeṣeṇa kapilāṣaṣṭhītyucyate | taduktaṃ purāṇasamuccayebhādre māsyasite pakṣe bhānau caiva karesthite | pāte kuje ca rohiṇyāṃ sā ṣaṣṭhī kapilā bhavet || saṃyoge tu caturṇāṃ tu nirdiṣṭā parameṣṭhinā || iti | mārgaśuklā campāṣaṣṭhī | tasyāṃ khaṇḍerāyākhyamallāripūjā brāhmaṇabhojanādi mallārimāhātmye dākṣiṇātyeṣu prasiddham | asyāṃ yogaviśeṣastatraivoktaḥ | mārge bhādrapade śuklā ṣaṣṭhī vaidhṛtisaṃyutā | ravivāreṇa saṃyuktā sā campetīha kīrtitā || iti | tathā— mārgaśīrṣe'male pakṣe ṣaṣṭhyāṃ vāreṃ'śumālinaḥ | śatatārāgate candre liṅgaṃ syāddṛṣṭigocaram || iti | iyaṃ ca yogaviśeṣeṇa pūrvā parā vā grāhyā | tadabhāve saptamīyuto kāryā | pūrvoktasāmānyanirṇayāditi dik