Kalasara 13.p27

13.p27

śrāddhānantarameva nānādānāni pratipāditāni| tatrādau nagnācchādanam | pretasyācchādanārthantu prathamaṃ vāsasī śubhe | datvānyāni ca deyāni pretakālocitāni ca || iti paiṭhīnasiruktaḥ | śubhe nave | tato mṛtaśayyādānaṃ bhaviṣyottaravidhinā | vistarabhayāt sa na likhitaḥ | smṛtiḥ,– gobhūhiraṇyavāsāṃsi dīpamannaṃ jalaṃ tilāḥ | śayyā prapānakaṃ caivaṃ pretadānāni vai daśa || bhaviṣyottaraviṣṇudharmottarayoḥ,— vastrayānāśvagobhūmiśayyācchādyyāsanāni ca | pretakāle praśastāni dānānyaṣṭau viśeṣataḥ || āgneye,— āsanaṃ taijasaṃ pātraṃ lavaṇaṃ gandhacandanam | dhūpaṃ dīpañca tāmbūlaṃ lohaṃ rūpyañca ratnakam || vrīhyādinānādravyāṇi datvā syāt bhuktimuktibhāk | anyāni kāṣṭhapādukādīni skāndādiyuktāni paddhatyanusāreṇa deyāni | tāni vistarabhayānna likhitāni | yadi daivānmaraṇadine mṛtāhapañcakasya dānābhāvaḥ tadā sarveṣāmādau tatpañcakadānaṃ | ekādaśāhāśrāddhamapi tridaṇḍisannyāsinaḥ pārvaṇameveti prāklikhitam