Tithididhiti 4.p1.38

4.p1.38

pratisaṃvatsaraṃ somaḥ paśuḥ pratyayanaṃ tathā | kartavyāgrayaṇeṣṭiśca cāturmāsyāni caiva hi | eṣāmasaṃbhave kuryādiṣṭiṃ vaiśvānarīṃ dvijaḥ| iti yājñavalkyavacanāt dravyābhāvena somādyasaṃbhave vaiśvānarī kāryā
iṣṭigrahaṇātsomakāryāpattāvapi na somadharmā ityaparārkaḥ | yattu
manuvākyaṃ kḷptānāṃ paśusomānāmiti tatra kḷptapadaṃ nityaparamityake | ārabdhaparamityanye | somaprabhṛtitattatkāryakāla eva
tattatpratyāmnāyabhūtā vaiśvānarī kāryā | tatraivāpekṣitavidhilopena
vidhipravṛtteḥ | iti vaiśvānarīkālaḥ
atha vājapeyakālaḥ | sa dvividhaḥ | kururāptaśceti
yathāha trikāṇḍamaṇḍanaḥ-vayaso vayaso dāne gosaptadaśakasya
vā | kururityucyate'nyeṣu pakṣeṣvāpto'bhidhīyate iti | tatrāpastambaḥ-śaradi vājapeyena yajeta brāhmaṇo rājanyo varddhikāmo
nityavadeke samāmananti prajāpatimāpnoti tasya ṣoḍaśivatkalpaḥ
sarvaḥ saptadaśo bhavati saptadaśa dīkṣāstisra upasada ekaviṃśī
prasūtastrayodaśa vā dīkṣāstisra upasadaḥ saptadaśī prasūta iti
kapardibhāṣye'hyabhāvābhiprāyeṇaikaviṃśī prasūta ityantaṃ vyākhyāyoktam-ekaviṃśīmityatra kalpāntaraṃ caturdaśa dīkṣāḥ ṣaḍupasadaḥ
ekaviṃśīṃ prasūtaḥ sāgnacitye | evaṃ trayodaśatve saptavopasada ityanvilāyām | saptadaśadīkṣāpakṣe śaradi daśamayāmupakramaḥ | trayodaśadīkṣāpakṣe caturdaśyāmubhayoḥ parvaṇoḥ sutyeti chandogalāṭyāyanasūtre tasya pūrṇamāsyāṃ dīkṣitvā trayodaśadīkṣāḥ syuḥ saptadaśa