Manava Dharmashastra 6.75

6.75

idaṃ tu jñānakarmaṇoḥ samuccayānmokṣa iti ślokadvayaṃ jñāpakam | pūrveṇa jñānamuktamanena karmāṇyucyante | "kāni punarvaidikāni karmāṇi yeṣāṃ phalaṃ tatpadaṃ prāpnotītyucyate | yāni tāvatkāmyāni teṣāṃ svavidhivākye śrutameva svargādi phalam | tadvyatirekeṇa phalāntarakalpanāyāmatiprasaṅgaḥ | saṃkīrṇaphalalāśrayaṇaṃ vā'narthakaṃ syāt | tāvatā ca vākyārthasya samāptervidhyanapekṣitatatpadaprāptilakṣaṇaphalena kathaṃ sambandhaḥ | śrutenaivānvayinā vidhyarthasampanne'nyat vidhirnāpekṣate |" atrocyate | astyevātra vākyāntaraṃ 'yajñena tadāpnotīti' rahasyādhikāre | tataśca saṃyogapṛthaktvātphaladvayaṃ yuktam | ataśca sarveṣāmeva kāmyānāmavicchinnaphalayogitā paramapadaprāptyarthatā ca na virotsyate | tatra ca yāgadvayena prayogabhedena svargāpavargau bhavataḥ | na cātra yajñaviśeṣaḥ śruto yena nityānāmetatphalaṃ syānna kāmyānām | athocyeta- "nityeṣvaśrutatvātphalāvacchedasyāvirodhāttadviṣayatā yuktā, na kāmyeṣu | tāvattaiva yajñenetyasya sarvaviṣayatvalābhāditi cet" | kimatra phalaśravaṇena ? kartavyatāniṣṭhāni ca vaidikāni vākyāni | sā ca kartavyatā'ntareṇa vaidikaṃ phalapadaṃ yāvajjīvādipadairavagamiteti | tatrāpi phalasambandho nāpekṣita eva | kalpyamāno'dhikatvānnaikakāryaṃ yāyāt | ato yajñeneti vākyamapratiṣṭhamānaṃ vivikte viṣaye sarvaṃ yajñaśabdavācyaṃ nityaṃ kāmyaṃ ca gocarayati | na caitatphalaṃ kāmyānām, apavargakāma ityaśrutatvāt | etadabhiprāyamevoktaṃ "kāmātmatā na praśasteti" (2 | 2) | mahābhārate'pi (gītā 2 | 47) "mā karmaphalaheturbhūrmā te saṃgo'stvakarmaṇi" iti | ataśca bhedagrāhapariveṣṭitāntaḥkaraṇasya tṛṣṇāvidyāvato'nirmuktāhaṃkāramamakārasyābhisaṃhitaparimitaphalaprāptiḥ | itarasya tvanabhisaṃdhāyaphalaviśeṣacoditatvātkartavyamitibuddhyā vartamānasyāparimitaniratiśayānandarūpabrahmavāptiḥ | na caitaccodanīyam- "ekasaptaśataṃ kratavo yāvanto vā teṣāṃ sarveṣāmanuṣṭhānasyāśakyatvādanārambhopadeśatā syāditi" | yato darśanasampattyaivātrānuṣṭhānasampattiḥ | ata evoktaṃ "samyagdarśanasaṃpanna" iti ( ślo0 74) | sarve ca kratavo darśanasampādanīyāḥ | tathā coktaṃ "jñānenaivāpare viprā yajante" iti | athavā yāṃllokānetītyavacchedanirdeśaḥ, svargakāmaḥ putrakāma iti | atītānādibhedagrahavāsitāntarātmāno dṛṣṭaphalalobhenāsatyenaiva pradhāne puruṣārthe pravartante | yathā bālaḥ puṣṭyarthe auṣadhe 'śikhā te vardhiṣyata' ityasatyayaiva śikhāvṛddhyā pravartyata iti kecit | aparaṃ matam | nityānyatra karmāṇyabhipretāni | tānyakriyamāṇāni pratyavāyahetutayā pratibandhakāni | atastairanuṣṭhīyamānairasati pratibandhe uktaṃ vaidikaiścaiva karmabhiriti, yadyapi tāni na mokṣārthatayā coditāni | ugrairatyantaṃ śarīratāpahetubhiḥ | tastha brahmaṇaḥ | padaṃ sthānaṃ brahmalokam | sādhayanti svīkurvanti | athavā tadīyapadaṃ yādṛśastasyādhikāraḥ, sarveśvaratvaṃ, svātantryaṃ, tadrūpaprāptiriti yāvat |

He who is not endowed with the spiritual insight, taught in the Vedānta, and who is only given to the performance of acts, falls into the cycle of births and deaths.—(74)