Dayabhaga 5.18

5.18

ayañca putrāṇāṃ vibhāgaḥ putrapautraprapautrāṇāṃ samāno
nātrotpattikrameṇādhikārakramaḥ putrādīnāṃ trayāṇāmiva pārvaṇe
tatpiṇḍatadbhojyapiṇḍadvayadānāviśeṣāt | ataeva devalaḥ
pitā pitāmahaścaiva tathaiva prapitāmahaḥ
upāsate sutaṃ jātaṃ śakuntā iva pippalam
madhumāṃsaiśca śākaiśca payasā pāyasena ca
eṣa no dāsyati śrāddhaṃ varṣāsu ca maghāsu ca
tathā śaṅkhalikhitayamāḥ
pitā pitāmahaścaiva tathaiva prapitāmahaḥ
jātaṃ putraṃ praśaṃsanti pippalaṃ śakunā iva
madhumāṃsena khaṅgena payasā pāyasena vā
eṣa dāsyati nastṛptiṃ varṣāsu ca maghāsu ca
prapitāmahagrahaṇāt putrapadaṃ prapautraparyyantaparam | tadanena
prapautraparyyantasya śrāddhadānena prapitāmahaparyyantopakārakatvāt
tulyo dāyādhikāraḥ