Danakhanda 3.p1

3.p1

śrīśaṅkarauvāca | tulādānaṃ pravakṣyāmi sarvapāpavināśanam | yadgauryā caritaṃ pūrvaṃ lakṣmyā nārāyaṇena ca || puṇyaṃ dinamathāsādya vyatīpāyāṃ viśeṣataḥ | gomayenānuliptāyāṃ bhūmau kuryānmaṭhaṃ śubham | dāravaṃ śubhavṛkṣasya caturhastapramāṇataḥ || suvarṇaṃ tatra badhnīyāt svaśaktyā ghaṭitaṃ ghaṭe | sauvarṇaṃ sthāpayettatra vāsudevaṃ caturbhujaṃ || śaktyā hyaṃtu badhnīyāt sthāpayet piṭake tataḥ | tatvāruhetsvavastrāstraḥ puṣpā-laṅkārabhūṣitaḥ || abhīṣṭāṃ devatāṃ dṛṣṭvā snāpayitvā ghṛtādibhiḥ | tulādānasya sarvvasya vidhireṣaḥ prakīrttitaḥ || prathamā tu ghṛtasyoktā tejovṛddhikarī tulā | mākṣikena tu saubhāgyaṃ tailena bahulāḥ prajāḥ || vastrasya divyavastrāṇi prāpnoti tulayā dhruvaṃ | lavaṇasya tu lāvaṇyamarogitvaṃ gur̤asya tu || asapatnī śarkarayā surūpā caṃdanena ca | aviyuktābhavedbhartrā tulāyāḥ kuṅkumasya ca || nasaṃtāpo hṛdi bhavetkṣīrasya tulayā sadā | sarvvakāmapradāḥ sarvāḥ sarvvapāpakṣayaṃ karāḥ || yo dadāti tulāḥ sarvāḥ sa gauryālayamāpnuyāta | mantreṇa dadyādabhimantritāṃ tu sakṛttulā mekatamāṃ dvijebhyaḥ | sa yāti gauryāḥ sadanaṃ supuṇyai rnaśoka-daurgatyamupāśnute pumān || tvaṃ tule sarvabhūtānāṃ pramāṇaṃ parikīrttitā | māṃ tolayantī saṃsārāduddharasva namostu te | ityāruhya kṣaṇaṃ sthitvā cintayitvā haripriyāṃ || avaruhya tato dadyādarddhaṃ pādamathāpi vā | guruṃ saṃpūjya vidhivat sarvvāvalaṅkārabhūṣaṇaiḥ || visarjayennamaskṛtya bhojayitvā vidhānataḥ | śeṣaṃ dvijebhyo dātavyaṃ strībhyonthebhyastathaiva ca || dṛṣṭabandhuviśiṣṭānāmāśritānāṃ kuṭumbināṃ | kadalīdalasaṃsthāntu pañcapiṇḍaṃ himādrijāṃ | karpūrasya tulāpūjyā kuṅkumenālabhettu tāṃ || avaruhya tulāyāstu gurave tāṃ nivedayet | vidhinānena yodadyāt tūlādānaṃ vimatsaraḥ || salokameti pārvvatyāḥ sevyamāno'psarogaṇaiḥ | tatroṣva kālaṃ suciramihaloke nṛpo bhavet