Danakhanda 35.p3

35.p3

athātaḥ sampravakṣyāmi tilaśailaṃ vidhānataḥ| yatpradānānnaroyāti viṣṇulokamanuttamam || uttamodaśabhirdrauṇaiḥ pañcabhiḥ madhyamomataḥ| tribhiḥ kaniṣṭhoviprendra tilaśailaḥ prakīrttitaḥ || pūrvvañcāparaṃ sarvvaṃ vṛkṣaviṣkambhakādikam | dānamantrān pravakṣyāmi yathāvadrājasattama || yasmāt madhuvane viṣṇo rdehakhedasamudbhavāḥ | tilāḥ kuśāśca māṣāśca tasmācchraddho bhavanviha || havyakavyeṣu yasmācca tilairevābhilakṣaṇam | bhavāduddhara śailendra tilācala namostu te || ityāmantrāya yo dadyāttilācalamanuttamam | sa vaiṣṇavaṃ padaṃ yāti punarāvṛttidurlabham || dīrghāyuṣyamavāpnoti iha cāmutra mānavaḥ| pitṛbhirdevagandharvvaiḥ pūjyamāno divaṃ vrajet || atha brahmāṇḍa purāṇāt bhagavānuvāca | ataḥ paraṃ pravakṣyāmi tilaparvvatamuttamam | yaddānaṃ sarvvadānānāṃ paratra phaladāyi ca || tilāḥ pavitramatulaṃ pavitrāṇāñca pāvanāḥ | viṣṇordehasamudbhūtāstasmāduttamatāṅgatāḥ || tilā bhavanti rakṣārthaṃ jagatāṃ tisṛṇāmapi | śuklapakṣe tu devānāṃ pradadyādyastilodakam || kṛṣṇapakṣe pitṝṇāñca snātvā śraddhāsamanvitaḥ | tilaiḥ saptāṣṭabhirvāpi samavetaṃ tilāñjalim || tasya devāḥ sapitaraḥ tṛptā yacchanti vāñchitam | śvakākopahataṃ yat patitādibhireva ca | tilaiḥ rabhyukṣitaṃ sarvvaṃ pavitraṃ syānnasaṃśayaḥ || evaṃ vidhaistilaiairyastu kṛtvā parvvatamuttamam | pradadyāddijamukhyāya puṇyantasyākṣayaṃ bhavet || vidhānaṃ tasya vakṣyāmi māhātmyamapi cottamam | vyatīpāte'yane caiva grahaṇe śaśisūryyayoḥ | janmarce viṣuve caiva deyaṃ māghe viśeṣataḥ || tilairyyat kriyatemāghe dānahomādikaṃ tathā | tadakṣayaṃ bhavelloke tarpaṇādikameva ca || tathā nadyāṃ gṛhe vāpi kṛtvā maṇḍapamuttamam | pūrvoktena vidhānena kuryyātsarvvamaśeṣataḥ