Danakhanda 8.p6

8.p6

sarvvaṃ prakalpya vidhivattīrthe deyaṃ vicakṣaṇaiḥ | kurukṣetre gayāyāṃ ca prayāge'marakaṇṭake || dvāravatyāṃ prabhāse ca gaṅgādvāre ca sukare | tīrtheṣveteṣu vai deyaṃ grahaṇe somasūryyayoḥ || dinacchidreṣu sarveṣu ayane dakṣiṇettare || vyatīpāte bahuguṇaṃ viṣuve ca viśeṣataḥ | dātavyametadrājendra vicāraṃ naiva kārayet || bālāgnihotriṇaṃ vipraṃ surūpañca guṇānvitam | sapatnīkaṃ ca saṃpūjya bhūṣayitvā vibhūṣaṇaiḥ || purohitaṃ mukhyatamaṃ kṛtvānyāṃśca tathartvijaḥ | caturviṃśadguṇopetān sapatnīkānnimantritān || ahatāmbarasucchannān sragvinaḥ suvibhūṣitān | aṅgulīyakaratnāni karṇaveṣṭāṃśca dāpayet || evaṃ vidhāṃśca saṃpūjya teṣāmagre svayaṃsthitaḥ | aṣṭāṅgapraṇipātena praṇamya ca punaḥ punaḥ || purohitāya purataḥ kṛtvā vai karasaṃpuṭam | yūyaṃ vai brāhmaṇā dhātrā maitratvenānugṛhyate || saumukhyeneha bhavatāmbhavat pūtonaraḥ svayam | bhavatāṃ prītiyogena svayaṃ prītaḥ pitāmahaḥ || brahmāṇḍena tu dattena teṣāṃ matijanārddanaḥ | pinākapāṇirbhagavān śakraśca tridaśeśvaraḥ || ete vai toṣamāyānti anudhyātā dvijottamaiḥ | evaṃ stutvā tato rājā brāhmaṇān vedapāragān