Abdadidhiti 2.p1

2.p1

atha saṃkṣepeṇa prayogaḥ | daśamyāṃ hemaropyatāmrānyatarasūtrasya kumārīkartitakārpāsasūtrasya vā navasūtrīṃ vidhāya pañcagavyena prokṣya praṇavena prakṣālya mūlenāṣṭottaraśatamabhimantrya śucideśe'ṣṭottaraśatatadardhatadardhaguṇitanavasūtryā devasya jānūrunābhiparyantāni ṣaṭtriṃśaccaturviṃśatidvādaśagranthikānyuttamamadhyamakaniṣṭhāni pavitrāṇi vidhāyāṣṭottarasahasranavasūtryāṣṭottaraśatagranthinavakamālāṃ vidhāya dvādaśanavasūtrībhiḥ tāvadgranthyekaṃ gandhapavitraṃ saptaviṃśatinavasūtryā gurupavitraṃ ca kṛtvā granthīnkuṅkumena rañjayitvā apāmārgabilvānyatarakāṣṭhena dantānsaṃśodhya | -kriyālopavidhātārthaṃ yattvayā vihitaṃ prabho | mayaitatkriyate deva tava tuṣṭyai pavitrakam | na me vighno bhaved atra kuru nātha dayāṃ mayi | sarvathā sarvadā viṣṇo mama tvaṃ paramā gatiḥ | iti prārthyaikabhaktena taddinamativāhya ekādaśyāṃ kṛtanityakriyaḥ śrīhariṃ mahāmaṇḍape rājopacāraiḥ saṃpūjya hareḥ purataḥ sarvatobhadrasthodakumbhe vaiṇavaṃ paṭalaṃ nidhāya tatra pūrvanirmitasakalasūtrāṇi nidhāya trisūtryāṃ brahmaviṣṇuśivānnavasūtryāṃ oṃkārasomavahnibrahmanāgaśaśisūryasadāśivaviśvedevān granthiṣu kriyā pauruṣī virājyaparājitā vijayā muktidā sadāśivā manonmanī sarvatomukhīḥ praṇavādi namontairetaireva yāvadgranthisaṃkhyāmāvartyamānanāmabhirāvāhya gandhādibhirabhyarcya gandhapavitraṃ dhūpitamādāya praṇavenābhimantrya-viṣṇutejodbhavaṃ ramyaṃ sarvapātakanāśanam | sarvakāmapradaṃ deva tavāṅge dhārayāmyaham | iti mantreṇa mūlasaṃpuṭitena bhagavatpādayoḥ samarpya prārthayet | oṃ āmantritosi deveśa