Abdadidhiti 4.p34

4.p34

atha kṛṣṇadvādaśyāṃ gopūjanaṃ hemādrau bhaviṣyā—saṃprāpte kārtike māsi kṛṣṇapakṣe kuruttama | dvādaśyāṃ kṛtasaṃkalpaḥ snātvā puṇyajalāśaye | naro vā yadi vā nārī naktaṃ saṃkalpya cetasi | tato madhyāhnasamaye kṛtvā devārcanādikam | pratīkṣetagamaṃ bhaktyā gavāṃ godhyānatatparaḥ | savatsāṃ tulyavarṇāṃ ca śīlinīṃ gāṃ payasvinīm | candanādibhirālipya puṣpamālābhirarcayet | kuṅkumālaktakairgandhairdhūpadīpaiḥ sugandhibhiḥ | arghyaṃ tāmramaye pātre kṛtvā puṣpākṣataistilaiḥ | candanaiḥ kusumairgandhaiḥ puṣpaiḥ kālodbhavaistathā | pādamūle tu dadyādvai mantreṇānena pāṇḍava | kṣīrodārṇavasaṃbhūte surāsuranamaskṛte | sarvadevamaye mātargṛhāṇārghya namonamaḥ | tato māṣādisaṃsiddhānvaṭakānnivedayet | surabhi tvaṃ jaganmātardevi viṣṇupade sthitā | sarvadevamaye grāsaṃ mayā dattamimaṃ grasa | tataḥ prārthayet | sarvadevamaye devi sarvadevairalaṃkṛte | mātarmamābhilaṣitaṃ saphalaṃ kuru nandini | iti | evamabhyarcya vidhivaddattvā gavi gavāhrikām | paryukṣya vāriṇā bhaktyā praṇamyātha punaḥ punaḥ | taddine tailapakkaṃ ca sthālīpakkaṃ yudhiṣṭhira | gokṣīraṃ goghṛtaṃ caiva dadhi takraṃ ca varjayet | māṣāñca kāmato'śnīyādrātrau vigatamatsaraḥ | bhūmau svapedbrahmacārī śṛṇuyātpuṇyamagryāt | iti | atra gokṣīrasamabhivyāhārāddadhitakre api gosaṃbandhinī varjye iti labhyate | gomūtraṃ gomayaṃ kṣīraṃ dadhi sarpiḥ kuśodakam | iti sāntapanavidhau gomūtrasamabhivyāhārāt kṣīre gosaṃbandhavat | vrataphalamapi tatraivoktam—ūrje'site dvādaśadbhi ca gāṃ savatsāṃ yāḥ pūjayanti vaṭakaiḥ kusumaiśca hṛṣṭaiḥ | tāḥ sarvakāmasukhabhogavibhūtibhājo matyai vasanti suciraṃ nṛpa jīvavatsāḥ | iti | atra pūjāyāḥ phalasaṃbandhātprādhānyam | sāyaṃ gavāgamanakālastatkālaḥ | saṃkalpanaktayoḥ prātaḥpradoṣau spaṣṭau | kālatrayavyāpti lābhe na saṃdehaḥ | dinadvaye ekaikāṅgasahitapradhānakālavyāptilābhe yugmādiśāstrānnirṇayaḥ | imāmeva dvādaśīmārabhya pañcasu dineṣu nīrājanamuktaṃ nāradīye—āśvine kṛṣṇapakṣe ca dvādaśyādiṣu pañcasu | tithiṣūktaḥ pūrvarātre nṛpanīrājanāvidhiḥ | nīrājayeyurdevāṃstu viprāṃścāśca turaṅgamān | jyeṣṭhāñśreṣṭhāñjaghanyāṃśca mātṛmukhyāśca yoṣitaḥ | iti | gauṇamukhyacāndramānābhyāmekādaśyāṃ dvādaśyāṃ ca kārttikāśvinasaṃbaṃdho na viruddhaḥ