Abdadidhiti 7.p2.2

7.p2.2

kathaṃ yamapurādhvānaṃ tyaktvā divaṃ vrajennaraḥ | etanme mahadāścaryaṃ pratyayaṃ kuru śaṃkara 16 śiva uvāca | śṛṇu devi yathāvṛttāṃ kathāṃ paurāṇikīṃ śubhām | yamaśāsanahartrīṃ ca śivaśāsanadāyinīm 17 kaścidāsītpurā kalpe niṣādaścāmiṣapriyaḥ | pratyantadeśavāsī ca bhūdharāsannabhūcaraḥ 18 sīmānte sa sadā tiṣṭhankuṭumbaparipālakaḥ | tanvā pīno dhanurdhārī śyāmāṅgaḥ kṛṣṇakañcukaḥ 19 baddhagodhāṅgulitrāṇaḥ sadaiva mṛgayārataḥ | evaṃvidho niṣādo'sau caturdaśyāṃ dinodaye 20 svadravyārthe vaṇigbhiḥ sa devatāgre nirundhitaḥ | tenāpi devatā dṛṣṭā janānāṃ vacanaṃ śrutam 21 upavāsaratānāṃ ca jalpatāṃ śivaśiveti ca | dinānte sa tadā muktaḥ prātardravyaṃ pradīyatām 22 tato'sau dhanurādāya dakṣiṇena gataḥ svayam | jagāma ca vanoddeśaṃ janahāsaṃ cakāra ha 23 śivaḥ śivaḥ kimetadvai vadanti nagare janāḥ | vanecarānnirīkṣansa caturdikṣu tatastataḥ 24 padaṃ ca padamārgaṃ ca mṛgasūkaracittalān | dhāvatastasya sarvāsu dikṣu vai labdhacetasaḥ 25 vanaṃ saparvataṃ sarvaṃ bhramatastu dinaṃ gatam | aprāptā eva gacchanti sakalā mṛgajātayaḥ 26 sa svalpamapi cāpaśyanna mṛgaṃ naca cittalam | nirāśau lubdhako yāvattāvadastaṃ gato raviḥ 27 cintayitvā jalopānte jāgaraṃ mṛgaghātanam | sa vidhāsyāmyahaṃ rātrau niścitaṃ mama jīvitam 28 taḍāgasaṃnidhau gatvā tattīre jālamadhyataḥ | nilayaṃ kartumārabdhamātmārthe guptikāraṇam 29 jālamadhye mahāliṅgamasti svāyaṃbhuvaṃ śubham | tato bilvasya patrāṇi troṭitvā mārgaśodhane 30 kṣiptāni dakṣiṇe bhāge gatāni liṅgamūrdhani |