Abdadidhiti 7.p26.3

7.p26.3

evaṃ vṛddhavasiṣṭhavacaneṣvapi—mṛgendrasaṃsthite jīve madhyadeśe karagrahe | mṛtyuyoge mṛtyudaḥ syāddampatyoḥ pañcavarṣataḥ | siṃhe siṃhāṃśage jīve kaliṅge gauḍagurjare | kālamṛtyurayaṃ yogo dampatyornidhanapradaḥ | mṛgendramadhyamāṃśasthe jīve yogo'śanistvayam | gautamīyāsyabhāge tu dampatyoḥ pañcavarṣataḥ | yogatrayaṃ varjanīyaṃ coktadeśeṣu sarvadā | udvāheṣvanyakāryeṣu cātyarthaṃ maṅgalapradam | iti | gautamīyāsyabhāgagrahaṇaṃ bhāgīrathyuttaropalakṣaṇārtham | tṛtīyo'pavādo jyotirnibandhe—maṅgalānīha kurvīta siṃhastho vākpatiryadā | bhānau meṣagate samyagityāhuḥ śaunakādayaḥ | iti | evaṃca maghāsthe gurau sarvamāṅgalikaniṣedhaḥ sarvadeśeṣu | siṃhāṃśe vivāhaniṣedho'pi sarvadeśeṣu | kaliṅgādideśaviśeṣaniṣedho doṣādhikyārthaḥ | gaṅgāgodāvarīmadhyadeśe tu vivāhavratabandhayoḥ sarvasiṃhasthe niṣedhaḥ | anyakarmaṇāṃ maghāsthaṃ vihāya sarvadeśeṣu karaṇam | meṣasthe sūrye tu sarvadeśeṣu sarvamāṅgalikakarmaṇāṃ siṃhasthe na doṣa iti | nacaiṣāṃ śāstrāṇāṃ parasparopajīvanena pravṛttimaṅgīkṛtya vyavasthāntaraṃ śakyam | sarveṣāṃ siṃhasthaniṣedhopajīvanena pravṛttyārthavattve sambhavati parasparopajīvanena pravṛtteranyāyyatvāt | yattu jyotirnibandhe bhṛguḥ—sīmantajātakādīni prāśanāntāni ca kramāt | kartavyāni na doṣosti pañcānanagate ravau | māṇḍavyaḥ—śrutivedhajātakānnaprāśanacūr̤ādikaṃ sarvam | ravibhavanasthe jīve kāryaṃ barjyo vivāhastu | tathā—magharkṣaṃ tu parityajya yadā siṃhe gururbhavet | tadā kanyā naboḍhā cetsubhagā supriyā bhavet | iti |