Kriyakaumudi (Govindananda) 1.p103

1.p103

vastutastu rāgaprāpta eva niṣedhavidhiḥ śāstraprāpte tvarthe paryudāsa eveti siddhāntaḥ | tataśca daśamīviddhetarāṃ kṛṣṇapakṣāviṣayāṃ ekādaśīṃ gṛhastha upavasediti vidhiḥ sampannaḥ, tadā ca kṛṣṇapakṣādervidhyagocaratayā kathaṃ tatra kiñcidbhakṣyādikalpanaṃ upavāsaniṣedhe tviti vacanantu dvādaśīllaṅghanabhiyā viṣṇurahasyavacanena yatra viddhāyāṃ pratiprasūyate tadviṣayameva | ato dvayorvacanayorekavākyatayā jalādimātrakiñcidbhakṣaṇarūpa evopavāsaḥ pratiprasavārthaḥ | ekabhaktenetyādivacanantu asāmarthyarogadinā jñeyaṃ atyantāsāmarthye tu patnyādidvārā kārayediti vakṣyate | yattu śrībhāgavataṭīkākṛtā śrīdharasvāminā | kalārddhāṃ dvādaśīṃ dṛṣṭvā niśīthādūrddhameva hi | āmādhyāhnāḥ1kriyāḥ sarvvāḥ karttavyāḥ śambhuśāsanāt || iti nāmaśūnyaṃ vacanaṃ likhitam | tat trayodaśyāṃ yadā na syādityādi sākaraviṣṇurahasyādivacanadarśanāt pūrṇāpyekādaśī tyājyeti pracetovacanadarśanāccāmūlamiti pratibhāti | ekādaśyupavāsaphalamāha rātrau jāgaraṇaṃ kurvvanniti | etena jāgaraṇagadādharapūjādikaṃ vakṣyamāṇadvādaśīpāraṇaniyamamaithunamasūrādivarjjanapūrvottaradinabhojanadvayanivṛttyādikaṃ copavāsavratasyāṅgamityuktaṃ, tadā ca nityasyāsya vratasya kadācit kiñcidaṅgahānyāpi karttavyā nitye kiñcidaṅgahāniḥ śakyā na tu kāmye iti darśitatvāt | athavā mokṣaphalakathanājjāgaraṇapurāṇaśravaṇayo-