Kriyakaumudi (Govindananda) 2.p14

2.p14

miti viṣṇunā sāmānyato'bhidhānāt | kriyāsamāptirapavargaḥ abhirūpo brāhmaṇaḥ | abhyaṅganiṣedhamāha matsyapurāṇe,tasmāt kṛtopavāsena snānamabhyaṅgapūrvvakam | varjjanīyaṃ prayatnena rūpaghnaṃ hi paraṃ nṛpa || saṅkalpitavratamavaśyaṃ karttavyamityāha chāgalaḥ,pūrvvaṃ vrataṃ gṛhītvā yo nācaret kāmamohitaḥ | jīvan bhavati cāṇḍālo mṛtaḥ śvā caiva jāyate || atra kāmamohita ityabhidhānādicchātyāga eva doṣo na tu pramādādināpi | tathā ca devalaḥ,sarvvabhūtabhayaṃ vyādhiḥ pramādo guruśāsanam | na vrataghnāni kathyante sakṛdetāni śāstrataḥ || sarvvabhūtabhayaṃ rājavyāghrādibhayaṃ pramādo vismaraṇam | udyogaparvvaṇi,aṣṭau tānyavrataghnāni āpo mūlaṃ phalaṃ payaḥ | havirbrāhmaṇakāmyā ca gurorvacanamauṣadham || aśauce tu gṛhītavrataṃ na tyājyaṃ 'na vratināṃ vrate na sacriṇāṃ satre' iti viṣṇunā tatrāśaucaparyuyudāsāt | tatrāpyanyadvārā pūjādikaṃ kārayitavyaṃ svayantu kāyavratamupavāsādikaṃ kāryyam | garur̤apurāṇe,prārabdhatapasāṃ strīṇāṃ rajo hanyādvrataṃ na hi | anyaiḥ pūjādikaṃ kuryyāt kāyikaṃ svayameva hi || krodhāt pramādāllobhādvā vratabhaṅgo bhavedyadi | dinatrayaṃ na bhuñjīta śiraso muṇḍanaṃ bhavet || tasmāt pramāde duḥkhe vā sūtake mṛtake'pi vā | jñātvā kāyavrataṃ kuryyāddānārccanavivarjjitam