Kriyakaumudi (Govindananda) 3.p162

3.p162

arddharātre vasordhārāṃ pātayedgur̤asarpiṣā | candrodaye śaśāṅkāya arghyaṃ dadyāddhariṃ smaran || śaṅke toyaṃ samādāya sapuṣpaphalacandanam | jānubhyāmavanauṅgatvā candrāyārghyaṃ nivedayet || kṣīrodārṇavasambhūta atrinetrasamudbhava | gṛhāṇārghyaṃ śaśāṅkemaṃ rohiṇyā sahito mama || jyotsnāyāḥ pataye tubhyaṃ jyotiṣāṃ pataye namaḥ | namaste rohiṇīkānta sudhāvāsa namo'stu te || evaṃ kṛtvā tathā rātrau prabhāte navamīdine | yathā mama tathā kāryā bhagavatyā mahotsavaḥ || brāhmaṇān bhojayedbhaktyā tebhyo dadyācca dakṣiṇām | hiraṇyaṃ kāñcanaṃ gāvo vāsāṃsi kusumāni ca || yadyadiṣṭatamaṃ loke kṛṣṇo me prīyatāmiti | evaṃ yaḥ kurute devyā devakyāḥ sumahatsavam || naro vā yadi vā nārī yathoktaṃ phalamāpnuyāt | putrasantānamārogyaṃ dhanadhānyarddhimadgṛham || parjjanyaḥ kāmavarṣī syādītībhyo na bhayaṃ bhavet | samparkeṇāpi yaḥ kaścit kuryyājjanmāṣṭamīvratam || viṣṇulokamavāpnoti so'pi pārtha na saṃśayaḥ