Kriyakaumudi (Govindananda) 4.p1

4.p1

gārur̤e,— bhādre kṛṣṇatrayodaśyāṃ yugādau śrāddhakṛnnaraḥ | gaṅgāyāṃ piṇḍadānena samaṃ phalamavāpnuyāt || bhaviṣye,— bhādre māsyasite pakṣe aghorākhyā caturdaśī | tāmupoṣya naro yāti śivalokamayatnataḥ || tasyāmanāhṛte deśe jāgaritvā śivārttanam | ye kurvvanti harasteṣāṃ prītaye muktimuktidaḥ || atra saṃvatsarapradīpaḥ,— athañca sauro bhādraḥ | śrāvaṇe māsi yā kṛṣṇā tithiḥ syāttu caturdaśī | dayitā sā hyaghorasya śivasya parameṣṭhinaḥ || iti śaivāgamāt | yato mukhyacāndraśrāvaṇasya kṛṣṇacaturdaśī siṃhārka eva labhyata iti | tadyuktaṃ yadā bhādro malamāsastadā karkaṭārke kṛṣṇacaturdaśīsambhavāt | vastutastu śaivāgame śrāvaṇapadopādānāt gauṇabhādra eva | mukhyaśrāvaṇakṛṣṇapakṣasya gauṇabhādrīyatvāt tena kadācit karkaṭārke'pyaghoracaturdaśīti | yattu,— siṃharābhigate sūryye kṛṣṇapakṣe caturdaśī | aghoreti samākhyātā sarvvapāpapraṇāśanī || iti bhaviṣyottaravacanaṃ tat prāyikasiṃhārkasambandhāditi | atra tithaidvaidhe vyavasthā prāgevoktā | marīciḥ,– māse nabhasyamāvasyā tasyāṃ darbhacayo mataḥ | ayātayāmāste darbhā viniyojyāḥ punaḥ punaḥ