Krityasarasamuccaya (Amritanatha Jha Sharman) 2.p33

2.p33

tathā ca dinamānasya pañcadaśamo vibhāgo dinamuhūrta evaṃ rātrāvapītyarthaḥ | tatrāṣṭamo muhūrttaḥ kutupaḥ | navamo rauhiṇaḥ | tathāhi— ahno muhūrttā vikhyātā daśa pañca ca sarvadā | tatrāṣṭamo muhūrtto yaḥ saḥ kālaḥ kutupaḥ smṛtaḥ || prātaḥkālādimāha— prātaḥkālo muhūrttāṃstrīn saṅgavastāvadeva hi | madhyāhnastrimuhūrttaḥ syādaparāhnastataḥ param || sāyāhnastrimuhūrttaḥ syācchrāddhaṃ tatra na kārayet | tataḥ paramiti muhūrttatrayamiti śeṣaḥ | ubhayadine kutupasya lābhe, athavā pūrvadine rauhiṇasyottaradine kutupastadobhayatra pūrvadina evaikoddiṣṭaṃ, vihitatvāviśeṣāt kapālādhikaraṇanyāyāt | yadi ca kutupamuhūrtte ekasminnapi dine kṣayatithirna labhyate tadā rauhiṇe śrāddhaṃ rauhiṇamullaṅghya na kartavyam | "rauhiṇantu na laṅghayet" iti vacanāditi || atha hastā'rke khañjanadarśanam | tatra darśanamantrau— nīlakaṇṭha ! śubhagrīva ! sarvakāmaphalaprada ! | pṛthivyāmavatīrṇo'si khañjarīṭa ! namo'stu te || tvaṃ yogayukto muniputrakastvamahaśyatāmeṣi śikhodgamena | saṃdṛśyase prāvṛṣi nirgatāyāṃ tvadaṅgajanāścaryya ? namo namaste || darśanaphalamāha tithitattve— abjeṣu goṣu gajabājimahorageṣu rājyapradaḥ kuśaladaḥ śuciśādvaleṣu | bhasmāsthikeśatuṣalomanakheṣu dṛṣṭo duḥkhaṃ dadāti bahuśaḥ khalu khañjarīṭaḥ