Lakshanaprakasha (Mitramishra) 11.p99

11.p99

varṣāsu pūjayedbhaktyā liṅgaṃ kanakapuṣpajam | kanakapuṣpajaṃ campakakiṃśukadhattūrakāñcanārapuṣpanirmitam | iha cāmuṣmike loke sukhī bhavati mānavaḥ | nīlotpalamayaṃ liṅgaṃ jñātvā śaradi mānavaḥ || pūjayan paramāṃ siddhiṃ bhaktyā prāpnoti mānavaḥ | hemante jātikusumairliṅgaṃ kṛtvā manoharam || bhaktyā samarcya matimān śivena saha modate | śiśire sarvapuṣpotthaṃ liṅgamabhyarcya mānavaḥ || sarvapāpaṃ vihāyāśu modate brahmaṇā saha | yena kena prakāreṇa yasya kasyāpi vastunaḥ || kṛtvā liṅgaṃ samabhyarcya gāṇapatyamavāpnuyāt | iti | pūrvoktasarvaliṅgapūjane tāratamyamapi śrūyatetatraiva, pāṣāṇātsphāṭikaṃ śreṣṭhaṃ sphāṭikātpadmarāgajam | padmarāgāttu kāśmīraṃ kāśmīrātpuṣparāgajam || indranīlaṃ puṣparāgādindranīlācca gomadam || gomadādvidrumaṃ śreṣṭhaṃ vidrumānmauktikaṃ varam | mauktikādrājataṃ śreṣṭhaṃ sauvarṇaṃ rājatādvaram || sauvarṇāddhīrakaṃ śreṣṭhaṃ hīrakātpāradaṃ param | pāradādbāṇajaṃ śreṣṭhaṃ tasmāt śreṣṭhaṃ na vidyate || sarvatīrthāni yajñāśca sāṅgā vedavratāni ca | surasaṅghā yoginaśca bāṇaliṅge vyavasthitāḥ | tadarcya vidhivadbhaktyā śivaloke mahīyate || bāṇe ca rājate ratne sphāṭike hemasaṃbhave | kāśmīre candrakānte ca liṅge svāyambhuve tathā || sadā sannihito devaḥ śarvaḥ satyādilakṣaṇaḥ | vidyate'harniśaṃ yasmāttasmātpūjyāni nityaśaḥ || iti | uktaliṅgeṣu kalau kṣipraphaladaṃ nānāvidhakāmanayā pārthivaliṅgameva pūjyam | tadapyuktamśivanāradasaṃvāde, ukteṣveteṣu liṅgeṣu liṅgamekaṃ samāśrayet | tatrāpi pārthivaṃ liṅgaṃ kṣipraṃ siddhipradaṃ bhavet || pārthivena tu liṅgena bahavaḥ siddhimāgatāḥ | devāsuramanuṣyāśca gandharvoragarākṣasāḥ || kṛte ratnamayaṃ liṅgaṃ tretāyāṃ hemasambhavam | dvāpare pāradaṃ śreṣṭhaṃ pārthivaṃ tu kalau yuge || aṣṭamūrtiṣu sarvāsu mūrtirvai pārthivī parā | evaṃ pārthivaliṅgaṃ tu liṅgeṣvanyeṣu vidyate || yathā sarveṣu deveṣu śreṣṭhaḥ kila maheśvaraḥ | evaṃ sarveṣu liṅgeṣu pārthivaṃ śreṣṭhamucyate || yathā nadīṣu sarvāsu jyeṣṭhā gaṅgā saridvarā | tathā sarveṣu liṅgeṣu pārthivaṃ śreṣṭhamucyate || iti | atraiva kāmanābhedena pūjane pārthivaliṅgasaṅkhyāpi smaryate | īśvara uvāca | mune sarvaprayatnena pārthivaṃ liṅgamuttamam | karttavyaṃ hi nṛbhirnityaṃ kāryamuddiśya yatnataḥ || saṅkhyā pārthivaliṅgānāṃ yathākāmaṃ nigadyate | mṛlliṅgaṃ pārthivaṃ lakṣaṃ muktimuktikaraṃ param || deśaṃ kālaṃ kulaṃ jñātvā kuryālliṅgaṃ phalapradam | na karoti yadā jñātvā na kāryaṃ tasya sidhyati || vidyārthī liṅgasāhasraṃ dhanārthī ca tadardhakam | putrārthī sārddhasāhasraṃ kanyārthī ca śatatrayam || vidvān liṅgāyutaṃ kuryātsarvapāpaharaṃ param || rājyārthī śatasāhasraṃ kāntārthī śatapañcakam | mokṣārthī koṭiguṇitaṃ bhūkāmaśca sahasrakam || rūpārthī trisahasraṃ tu tīrthārthī dvisahasrakam | suhṛtkāmaḥ sahasraṃ tu vastrārthī śatamaṣṭakam | māraṇārthī saptaśataṃ mohanārthī śrāṣṭakam || uccāṭanaparaścaiva sahasraṃ ca yathoktataḥ | stambhane ca sahasraṃ tu jāraṇe ca tadardhakam || nigaḍānmuktikāmasya sahasraṃ sārddhamīritam | mahārājabhaye pañcaśataṃ caurādisaṅkaṭe || śatadvayaṃ tu ḍākinyā bhaye pañcaśataṃ param | daridraḥ pañcasāhasramayutaṃ sarvakāmadam | ekaṃ pāpaharaṃ proktaṃ dviliṅgaṃ cārthasiddhidam || triliṅgaṃ sarvakāmānāṃ kāraṇaṃ paramīritam | uttarottaramevaṃ syātpūrvoktagaṇanāvidhi || iti | granthāntare, liṅgānāmayutaṃ kṛtvā mahārājabhayaṃ haret | sahasramekaṃ liṅgānāṃ vyādhīnāṃ tu bhayaṃ haret || sahasrāṇi tathā pañca nigaḍānmuktaye dhruvam | kārāgṛhavimuktyarthamayutaṃ kārayedbudhaḥ || ḍākinyādibhaye saptasahasraṃ kārayettathā | sahasrāṇāṃ ca pañcāśadaputro hi prakārayet || liṅgānāmayutenaiva kanyakā santatiṃ labhet || ekaliṅgārcanenaiva hyatulāṃ śriyamāpnuyāt | lakṣamekaṃ tu liṅgānāṃ yaḥ karoti naro bhuvi || śiva eva bhavetso'pi nātra kāryā vicāraṇā | iti