Bhagavantabhaskara 21.p18

21.p18

yathā— bhadrāyutā cetpratipattu labhyate viruddhayogairapi saṅgatā satī | saivāparāhṇe vibudhairvidheyā strīputrarājyādivivṛddhihetuḥ || iti | kalaśasthāpanaṃ tu divaiva kāryam | na rātrau | taduktaṃ mātsye— na rātrau sthāpanaṃ kāryaṃ na ca kuṃbhābhiṣecanam || iti | atra trirātramapyuktaṃ dhaumyena— trirātraṃ cāpi kartavyaṃ saptamyādi yathākramam || iti | atha vistareṇa navarātrakṛtyaṃ devīpurāṇe— kanyāsaṃsthe ravau śakra śuklāmārabhya nandikām | ayācī tvathavaikāśī naktāśī vā'tha vāyvadaḥ || prātaḥsnāyī jitadvandvastrikālaṃ śivapūjakaḥ | japahomamadāyuktaḥ kanyakāṃ bhojayenmudā || śivaśca śivā ca śivau tayoḥ pūjakaḥ | nandā ca pratipadeva prathamopasthitatvāt | bhaviṣye— trirātraṃ cāpi kartavyaṃ saptamyādi yathākramam | tatra pratipadi pūrvāhne tilatailena snāto yajamāno gaṇapatiṃ saṃpūjya deśakālau nirdiśya navamīparyantāmupavāsādyanyataraniyamopeto durgāpūjanamamukaphalakāmaḥ kariṣye iti saṃkalpayet | tataḥ kadalīstambhavastrādimaṇḍite gṛhe caturasracaturhastavedikopari sarvatobhadrādimaṇḍalaṃ vidhāya tatra ‘mahīdyauḥ’ ityādivaruṇapūjāntaṃ kalaśasthāpanaṃ kuryāt | sauvarṇādipratimāpūjārtham ‘pūjyā maṇḍalakumbhasthāḥ’ iti devīpurāṇāt | mṛnmayādikā tu kalaśasya paścādāsane sthāpyā | vedikoṇeṣvapi catvāraḥ kalaśāḥ sthāpyāḥ