Bhagavantabhaskara 45.p2

45.p2

sādhūn pariṇatavayaso'vikarmasthān śrotriyānaśiṣyānanantevāsinaḥ ' iti | antevāsī śuśrūṣakaḥ | kātyāyanaḥ—' snātakāneke yatīn gṛhasthān sādhūnvā śrotriyān vṛddhānanavadyānsakarmasthānabhāve'pi śiṣyānsadācārān ' iti | manuḥ—yatnena bhojayecchrāddhe bahvacaṃ vedapāraṃgam | śākhāntagamathādhvaryuṃ chandogaṃ vā samāptigam || iti | vā śabdo'pisthāne | śātātapaḥ— bhojayedyathatharvāṇaṃ daive pitrye ca karmaṇi | anantamakṣayaṃ caiva phalaṃ tasyeti vai śrutiḥ || atra kecit 'yathā kanyā tathā haviḥ' iti kanyāsādharmyeṇa svaśākhīyameva śrāddhe niyojayanti | tanna | kanyāyāmiva svaśākhīyaniyame mānābhāvāt | vacanaṃ tu kulīnaniyamaparaṃ yuktamiti | bṛhaspatiḥ— yadyekaṃ bhojayecchrāddhe chandogaṃ tatra bhojayet | ṛco yajūṃṣi sāmāni tritayaṃ tatra vidyate || yamaśātātapau— chandogaṃ bhojayecchrāddhe vaiśvadeve ca bahvacam | puṣṭikarmaṇi vā'dhvaryuṃ śāntikarmaṇyatharvaṇam || brahmavaivarte— viprāngṛhasthānvedārthavido nirabhimāninaḥ | patnīputrasamāyuktān śrāddhakarmaṇi bhojayet || nandipurāṇe— catvāra āśramāḥ puṇyāḥ śrāddhe daive tathaiva ca || iti | kūrmapurāṇe— asamānapravarako hyasagotrastathaiva ca | asambandhī ca vijñeyā brāhmaṇāḥ śrāddhasiddhaye || yamaḥ— nakṣatratithipuṇyāhān muhūrtānmaṅglāni ca | na nirdiśanti ye viprāstairbhuktaṃ hyakṣayaṃ bhavet