Bhagavantabhaskara 45.p28
Bhagavantabhāskara 45.p28
- Language
- Sanskrit
45.p28
atha vipranimantraṇādi | kaurme— śvo bhaviṣyati hi śrāddhaṃ pūrvedyurabhipūjayet | asaṃbhave paredyurvā brāhmaṇāṃstānnimantrayen || iti | nāgarakhaṇḍe— pūrvedyuḥ sāyamāsādya saṃyutānāṃ dvijanmanām | gṛhaṃ gatvā śucirbhūtvā saṃyatāṃstānnimantrayet || yamaḥ— prārthayīta pradoṣānte bhuktānaśayitān dvijān | iti | nimantraṇaṃ svayameva kāryam | 'dātā viprānnimantrayet' iti hemādrau devalokteḥ | asaṃbhave tu putrādayo'pi | svayaṃ śiṣyo'thavā sutaḥ iti tatraiva bṛhaspatyukteḥ | kāṃścinniṣedhati nārāyaṇaḥ— abhojyaṃ brāhmaṇasyānnaṃ kṣatriyādyairnimantritam | tathaiva kṣatriyādīnāṃ vṛṣalena nimantritam || yamaḥ—abhojyaṃ brāhmaṇasyānnaṃ vṛṣalena nimantritam | tathaiva vṛṣalasyānnaṃ brāhmaṇena nimantritam | nāgarakhaṇḍe— kulācārasamopetān gṛhītvā caraṇau tataḥ | prasādayecca savyena viśvedevārcane purā | yugmāneva yathāśaktyā mantrametamudīrayet || āgacchantu mahābhāgā viśvedevāstanau tava | bhaktyāhūto mayā caiva tvaṃ cāpi vratabhāġbhava || evaṃ yugmānsamāmantrya vaiśvadevakṛte dvijān | ayugmānapasavyena pitrarthe cābhimantrayet || brāhmaṇāṃśca yathāśaktyā ekaikasya pṛthak pṛthak | ekaikaṃ vā trayāṇāṃ vā'pyekameva nimantrayet | dvijaṃ mātāmahānāmapyeṣa eva vidhiḥ smṛtaḥ || tataḥ pādau parispṛśya dvijasyedamudīrayet | śraddhāpūtena manasā pitṛbhaktiparāyaṇaḥ || pitā me tava kāye'smin tathaiva ca pitāmahaḥ | svapitrā sahito'bhyetu tvaṃ ca vrataparo bhava || evaṃ pitṝnsamāhūya tathā mātāmahānatha | savyaṃ kṛtvā namaskṛtya tānviprānsvagṛhaṃ vrajet || tatraivabrāhmaṇānāṃ gṛhaṃ gatvā tānprāthyè vinayānvitaḥ | amukasya tvayā śrāddhe kṣaṇo vai kriyatāmiti || vadedabhyupagaccheyurviprāścaiva tatheti ca | bhūyo'pi vyāharetkartā taṃ prāpnotu bhavāniti || dvijastu prāpnavānīti vidhireṣa nimantraṇe | pracetāḥkṛtāpasavyaḥ pūrvedyuḥ pitṛpūrvaṃ nimantrayet | bhavadbhiḥ pitṛkāryaṃ vaḥ saṃpādyaṃ naḥ prasīdata || yājñavalkyaḥdvau daive prāk trayaḥ pitrye udagaikaikameva vā | mātāmahānāmapyevaṃ tantraṃ vā vaiśvadevikam || vasiṣṭhaḥdvau daive tvatha pitrye trīnaikaikamubhayatra vā | bhojayetsusamṛddhyā'pi vistaraṃ tu vivarjayet || iti