Cakranarayaniyanibandha 1.p53

1.p53

atha bhādraśuklapañcamyāmṛṣipañcamīvratam || tatra vedyāṃ saptarṣipūjā, akṛṣṭabhūmijaśākāhāramātram, sarvapāpakṣayaḥ sarvakāmalābhaḥ phalam | asyāmeva brahmapurāṇoktaṃ sarpadaṣṭoddhāravratam | daṣṭasya durgatiparihārāya putrādibhiḥ kāryametat, sauvarṇaṃ rājataṃ vā nāgaṃ pūjayet | viprapūjā godānam, naktakaraṇam, pratimādānam, phalaṃ daṣṭoddhāraḥ | vratakartturviṣṇusalokatā || athāśvinasitapañcamyāṃ bhaviṣyottaroktaṃ śacīsahitanāgapūjāvratam || kuśamayaṃ śacīsahitaṃ nāgaṃ ghṛtakṣīrajalaiḥ saṃstrāpya kṣīrasiktaṃ godhūmannaṃ naivedyaṃ dadyāt, śeṣādināgaprītiḥ phalam || atha kārtikaśuklapañcamyāṃ bhaviṣyottaroktaṃ jayāvratam | jayāsahitaharipūjā | veṇupātrādikaṃ dattvā rakṣābandhanamācaret | akṣatāḥ sarṣapā dūrvā rakṣāmadhye ca rocanā || oṃ yena baddho balī rājā dānavendro mahābalaḥ | tena tvāṃ pratibadhnāmi rakṣe mācala mācaleti rakṣāmantraḥ | grahapīḍādiśāntiḥ yuddhādivijayaḥ phalam | asyāmeva varāhapurāṇoktaṃ śāntivratam | ābdamarahitaṃ bhojanam, rātrau śeṣasthaharipūjanam, homaḥ, abdānte udyāpanam | nāgabhayanivṛttiḥ phalam | atha mārgasitapañcamyāṃ bhaviṣyottaroktaṃ śrīpañcamīvratam | upavāsaḥ svarṇalakṣmīpūjā suvāsinīpūjā | brāhmaṇāya pratimādānam,pāraṇam varṣānte samāpanam | phalamekaviṃśatyanvayāntaṃ gṛhe śrīsthiratā | purāṇasamuccaye—māghamāse suraśreṣṭha śuklāyāṃ pañcamītiyau | ratikāmau tu sampūjya karttavyaḥ sumahotsavaḥ | dānāni ca pradeyāni tena tuṣyati keśavaḥ | iyamapi śrīpañcamīti prasiddhā, vasantapañcamītyeke