Gadadharapaddhati 11.p67

11.p67

atha kramaprāptanaimittikaśrāddhasya kālavicāraḥ | śrāddhakālanigamoktakārikā yāḥ svadeśabudhatoṣakārikāḥ | anyadeśamatatāpakālikāstāstanomyuditayuktikalikāḥ | tathā ca,— muhūrttāt saptamādūrddhaṃ muhūrttāt daśamādadhaḥ | ekoddiṣṭasya kālo'yaṃ muhūrttāt daśamāt param || muhūrttatritayaṃ kālya śramāvāsyasya saptamāt | parataḥ pañca muhūrttāḥ pārvaṇasyetarasya tu || pūrvāhne prathamādūrddhaṃ yanmuhūrttacatuṣṭayam | tadābhyudayikaśrāddhakālatvenāvadhāritam || ekoddiṣṭasya kālaścenna labhyeta dinadvaye | muhūrtte daśamādāvapyekoddiṣṭaṃ tadā bhavet || pārvaṇasya tu muhūrttāḥ pañca ye parikīrttitāḥ | teṣāṃ pare'ṣṭamācchastā aṣṭamastadasambhave || dinadvaye'pi labhyeta kālaścet prathamādaraḥ | pūrvaṃ vā mukhyacodanā lokavat prāha jaiminiḥ || tatrādau naimittikasya vārṣikaśrāddhasyāvaśyakatvaṃ bhaviṣye,— mṛte'hani pituryastu na kuryyācchrāddhamādarāt | mātuścaiva varārohe vatsarāste mṛte'hani || nāhaṃ tasya mahādevi pūjāṃ gṛhṇāmi no hariḥ | tathā,– paṇḍitā jñānino vāpi mūrkhā yoṣita eva vā || mṛtāhaṃ samatikramya caṇḍālāḥ saptajanmasu | śatānandasaṃgrahe,– śrāddhānāṃ caiva sarveṣāṃ śreṣṭhaṃ sāmbatsaraṃ smṛtam | tat prayatnena kurvīta akurvannarakaṃ vrajet || phalaṃ cāha hariharasamuccaye,– grahaṇānāṃ sahasreṣu amāvāsyāśateṣu ca | tato'kṣayataraṃ yāti yastu kuryānmṛte'hani | tacca dvividham,– ekoddiṣṭaṃ pārvaṇaṃ ceti | yamaḥ,– sapiṇḍīkaraṇādūrddhaṃ pratisaṃvatsaraṃ sutaiḥ | mātāpicoḥ pṛthak kāryamekoddiṣṭaṃ mṛte'hani || atra bhaviṣyoktirapyuktā | yamadagniḥ,– āpādya sahapiṇḍatvamauraso vidhivatsutaḥ | kurvīta darśavacchrāddhaṃ mātāpitroḥ kṣaye'hani | pārvaṇavidhinetyarthaḥ | evaṃ yājñavalkyena ekoddiṣṭamuktaṃ | manunā pārvaṇamuktam | evaṃ ca ubhayoryavabrīhivat vikalpaḥ | nanu yavabrīhivikalpe nindoktirnāsti | iha tu,– tataḥ prabhṛti saṃkrāntāvuparārgādiparvasu | tripiṇḍamācarecchrāddhamekoddiṣṭaṃ mṛte'hani || eṃkoddiṣṭaṃ parityajya pārvaṇaṃ yaḥ samācaret | sa devapitṛhrā sa syānmātṛbhrātṛvināśakaḥ || mṛtāhe pārvaṇaṃ kurvannadho'dho yāti mānavaḥ | saṃṣṭakeṣvākulībhāvaḥ preteṣu tu tato bhavet