Gadadharapaddhati 15.p13

15.p13

atha ṣāṇmāsikam | tatpūrvvadine ūnaṣāṇmāsikam | tatra paiṭhīnasiḥ,– ṣāṇmāsikābdika sāṅke syātāṃ pūrvvedyureva hi | ekāhena tu iti vacanamapyuktam | ataeva prathamaṣaṇmāsābhyantare'dhimāsapāte tu, adhimāsaṃ gṛhītvaiva ṣaṣṭhamāsapūrvvatithāveva ūnaṣāṇmāsikaṃ kāryyam, yatra vā tatra vā iti pūrvvokteḥ | atha dvitīyaṣāṇmāsikam | tasya ūnasāmbatsarikamiti nāmāntaram | pūrvedyurābdikaṃ śrāddhaṃ paredyuḥ punarābdikam | iti śaṅkhokteḥ | etatṣaṇmāsābhyantare'dhimāsapāte sati trayodaśamāsikapūrvvatithāveva ūnasāmbatsarikam | "dvādaśamāsāḥ sambatsaraḥ kvacittrayodaśamāsāḥ sambatsaraḥ” iti śruteḥ | nanu abdamadhye adhimāsapāte tatra sarvvakarmaniṣedhāt tatra māsikaṃ śrāddhaṃ na kāryyaṃ, kiṃ vā kutra vā kāryyaṃ, iti sandehe, gabhastiḥ,– ekoddiṣṭaṃ tu yacchrāddhaṃ tannaimittikamucyate | tat kāryyaṃ pūrvvamāse'pi kālādhikye ca dharmataḥ || pūrvvamāse malīmluce | viṣṇudharmottare,– sambatsarasya madhye tu yadi syādadhimāsikam | tadā trayodaśe māsi kriyā pretasya vārṣikī || bharadvājaḥ,– adhimāse tu yacchrāddhaṃ kuryyāttadadhimāsikam | iti adhimāsavihitaṃ śrāddhaṃ adhimāsa eva kāryyam | marīcirapi,– pratimāsaṃ mṛtāhne ca yacchrāddhaṃ prativatsaram | māsadvaye'pi karttavyamanyathā kilviṣī bhavet