Gadadharapaddhati 19.p54

19.p54

mātsye,— gayāśrāddhasamayogāḥ, bharaṇī pitṛpakṣe tu mahatī parikīrttitā | tasyāṃ śrāddhaṃ kṛtaṃ yena sa gayāśrāddhakṛdbhavet || yadenduḥ pitṛdaivatye haṃsaścaiva kare sthitaḥ | yāmya tithirbhavet sā hi gajacchāyā prakīrttitā || āṣāḍhyāḥ pañcame pakṣe gayāmadhyāṣṭamī smṛtā | trayodaśī gajacchāyā gayātulye tu paitṛke || iti mahālaye yogaviśeṣaphalam | śastrahatasya mahālayāddhavicāraḥ | brāhme, - tarpaṇīyāścaturdaśīṃ luptapiṇḍodakakriyāḥ | śastreṇa nihatā ye vai teṣāṃ tatra pradīyate || vai iti niyamavācakam | tathāca “vasante brāhmaṇo'gnīnā dadhīta” itivadubhayaniyamaḥ | caturdaśyāṃ śastrahatasya eva śrāddham, nānyeṣām | śastrahatasya caturdaśyāṃ nānyāyāṃ tithānvityarthaḥ | tatra tasya śrāddhameva ekoddiṣṭavidhinaiva | tadāha marīciḥ, - samatvamāgatasyāpi pituḥ śastrahatasya vai | ekoddiṣṭantu karttavyaṃ pitṝṇāṃ tu mahālaye || samatvamāgatasya kṛtasapiṇḍanasyāpītyarthaḥ | śastrahatasaṃjñā pāribhāṣikī | tathāca bhagavatīpurāṇe,— pakṣibhantsyamṛgairye tu śṛṅgidaṃṣṭrinakhairhatāḥ | patanānaśanaprāyairvajrāgniviṣabandhanaiḥ || mṛtā jalapraveśena te vai śastrahatāḥ smṛtāḥ | bṛhanmanuḥ, - sarpairhatā raṇe vyāghraiḥ kumbhīraiśca gajairvṛṣaiḥ | utpātena ca vajraiśca śrāddhaṃ teṣāṃ caturdaśīm || marīciḥ,- viṣaśastrāpadāditiryagbrāhmaṇaghātinām | caturddaśyāṃ kriyā kāryyā anyeṣāṃ tu vigarhitā