Gadadharapaddhati 4.p121

4.p121

tathā, — saṃtarjayantī oṃkārairvighnaughān pātakān varān | navamyāṃ pūjitā devī dadātyanavamaṃ phalam || sā puṇyā sā pavitrā ca sā sarvasukhadāyinī | tadā tasyāṃ pūjanīyā cāmuṇḍā muṇḍamālinī || tathā, — manvantareṣu sarveṣu kalpeṣu kurunandana | teṣu sarveṣu caivāsīnnavamīyaṃ surārcitā || prasiddhā navamī dhanyā varṣe varṣe yudhiṣṭhira | bhūyo bhūyo'vatāreśca bhavānī pūjyate suraiḥ || vatīrṇā ca sā devī bhuvi daityanibarhaṇī | svargapātālamartyeṣu karoti sthitipālanam || agnihotrapare vipre vedavedāntapārage | suvarṇasya śate datte kurukṣetre ca yat phalam || tat phalaṃ labhate rājan pūjayitvā tu caṇḍikām | na tadgehe ca durbhikṣaṃ na ca duḥkhaṃ pravarttate || na kaścin mriyate rājā pūjyate yatra caṇḍikā | ye durgāṃ pūjayantīha pūjitaṃ tairjagattrayam || tasmāddurgārcanaṃ śreṣṭhamṛṣibhirgīyate kalau | devīpurāṇe, — māsi cāśvayuje vīra śuklapakṣe triśūlinīm | navamyāṃ pūjayedyastu tasya puṇyaphalaṃ śṛṇu || aśvamedhasahasrasya rājasūyaśatasya vai | tat phalaṃ labhate vīra devīdevagaṇairvṛtaḥ || tathā, — mahānavamyāṃ pūjeyaṃ sarvasiddhipradāyikā | sarveṣu vatsa varṇeṣu tadbhaktyā parikīrttitā || kṛtvāpnoti yaśorājyaputrāyurddhanasampadaḥ