Jayasimhakalpadruma 1.p21.2

1.p21.2

itarasya tu parābhimatatvenābhidhānādgauṇatvasyābhipretatvāt | atra vacane nakṣatradarśanāditi lyablope pañcamī | ataśca nakṣatradarśanaṃ prāpya naktavihitabhojanaṃ vidheyamityarthaḥ | ' atathātve paratra syādatrāvārgastato hi sā' iti jābālivākye dinadvaye'pi pradoṣavyāptyabhāve sāyāhnavyāpterāśrayaṇācca yadā naktatithiḥ pūrvadine pradoṣaṃ vyāpnoti astamayādavacīnaṃ trimuhūrttaṃ paradine vyāpnoti kiṃcidvā spṛśati tadā pūrvatraiva naktaṃ kāryam | taduktaṃ jābālinā-'ahaḥsu tithayaḥ puṇyāḥ karmānuṣṭhānato divā | naktavrateṣu sarvatra rātriyogaḥ praśasyate' | iti | yadā naktatithiḥ pūrvāparayorahvoḥ pradoṣaṃ vyāpnoti tadā paraiva grāhyā, divārātrivyāpitvāt | tadāha jābāliḥ'yadi syādubhayorahvoḥ pradoṣavyāpinī tithiḥ | tatrottaratra naktaṃ syādubhayatrāpi sā yataḥ' | iti divā rātrāvapītyarthaḥ || yattu kūrmapurāṇe pradoṣakālasyāstamayātprācīnamuhūrtatrayasya ca naktakālatvābhimānam | 'pradoṣavyāpinī yatra trimuhūrtā divā yadi | tadā naktavrataṃ kuryātsvādhyāyasya niṣedhavat' | tanmukhyagauṇasādhāraṇenāvagantavyam | yattu bhaviṣyapurāṇādāvito'lpakālagrahaṇam , tadamukhyakālatvepi tatprāśastyāyeti | tenāsya na virodhaḥ| nanu-‘udayātprāktanī saṃdhyā ghaṭikātrayamucyate| sāyaṃsandhyā trighaṭikā astādupari bhāsvataḥ| iti skandapurāṇe saṃdhyāyā ghaṭikātrayātmakatvābhidhānāttasyāṃ ca‘catvārīmāni karmāṇi saṃdhyāyāṃ parivarjayet| āhāraṃ maithunaṃ nidrāṃ svādhyāyaṃ ca caturthakam|’iti vacanena bhojanapratiṣedhātkathaṃ nakṣatradarśanānantaraṃ naktabhojanavidhānamiti cet|